Тры дні да старту галоўнай спартыўнай падзеі лета. "Полымя міру" сустрэлі ў Мінску

"Полымя міру" - у Мінску! Учора ўвечар на плошчу Дзяржаўнага флага прыбыў сімвал ІІ Еўрапейскіх гульняў. Эстафета пераадолела вялізны шлях з Рыма ў беларускую сталіцу, пабывала ў сямі краінах Еўропы. Занеслі факел на плошчу Флага трое ўслаўленых беларускіх спартсменаў: Дар'я Домрачава, Аляксандр Багдановіч і Марына Арзамасава. А прыняў эстафету трохразовы алімпійскі чэмпіён Аляксандр Мядзведзь. Усе яркія моманты цырымоніі пакажа Надзея Сербіненка.

Яшчэ за дзве гадзіны да пачатку цырымоніі ля плошчы Флага пачалі збірацца яе ўдзельнікі. У ліку першых самыя дысцыплінаваныя - валанцёры ІІ Еўрапейскіх гульняў. 1200 маладых людзей і дзяўчат некалькі тыдняў рэпеціравалі танцавальны флэшмоб.

Бліжэй да дзевяці вечара пачалі падцягвацца віп-госці - факеланосцы і зорныя паслы Гульняў. З заходам сонца адбыўся доўгачаканы і кранальны момант. Тры факеланосцы: Дар'я Домрачава, Аляксандр Багдановіч і Марына Арзамасава - занеслі "Полымя міру" на плошчу Флага!

Ужо заўтра сімвал II Еўрапейскіх гульняў пабывае на прадпрыемствах Мінска, таксама ў Парку высокіх тэхналогій і Белтэлерадыёкампаніі. А завершыцца эстафета 21 чэрвеня на алімпійскім стадыёне "Дынама".