Будзе гатовы да 2018 года. Найстарэйшы і адзіны ў нашай краіне алімпійскі стадыён - "Дынама" - знаходзіцца ў стадыі рэканструкцыі. З футбольнай арэна ператворыцца ў лёгкаатлетычную. І нават з улікам таго, што да завяршэння работ застаюцца тры гады, стадыён ужо прэтэндуе на чэмпіянат Еўропы.
Рэпартаж Паўла Капуцкага. Вялікая будоўля ў цэнтры Мінска. Тое, што тут раней быў стадыён, можна зразумець толькі па дэталях. З чатырох асвятляльных мачтаў засталася толькі адна. Няма ні крэслаў, ні бегавых дарожак, а замест поля - катлаван.
У кастрычніку 2012-га БАТЭ выйграў тут у "Баварыі". Праз два месяцы стадыён закрылі на рэканструкцыю. Мінулі два з паловай гады, а работы па-ранейшаму вядуцца не на стварэнне, а на разбурэнне.
Дэмантаж завершаны на 80 працэнтаў, гавораць будаўнікі. Паралельна зацвярджаюцца дэталі праекта. Згодна з планам, у ліпені 2018 года на "Дынама" павінен прайсці чэмпіянат Беларусі па лёгкай атлетыцы. Праз год - Еўрапейскі юнацкі алімпійскі фестываль.
Старшыня Беларускай федэрацыі лёгкай атлетыкі Вадзім Дзевятоўскі яшчэ на пачатку тыдня быў у швейцарскай Лазане.
Беларусь падала заяўку на зімовы чэмпіянат Еўропы - 2019. Калі выберуць нас, спаборніцтвы пройдуць на "Мінск-Арэне". Шанцы прыняць гэты турнір вялікія, чаго не скажаш пра летні чэмпіянат - 2020. Вельмі ўжо шмат работ трэба правесці для падрыхтоўкі "Дынама".
Легендарныя перамогі мінскага "Дынама", матчы футбольнага турніру Алімпіяды-80, яркія гульні БАТЭ і нацыянальнай зборнай. Футбольная эра стадыёна "Дынама" ў мінулым. Пачынаецца лёгкаатлетычная.