Спартыўны год у Беларусі афіцыйна адкрыты: такі своеасаблівы старт у нашай краіне ўжо 13 год запар дае Калядны турнір па хакеі сярод аматараў на прыз Прэзідэнта Беларусі. Падзея асаблівая і знакавая - аналагічных такіх у свеце больш не праводзіцца. У Мінску збіраюцца былыя зоркі хакея, каб ізноў паказаць сваё майстэрства і пагрузіцца ў баталіі бескампраміснай барацьбы. І менавіта госці Беларусі ўсё часцей называюць гэтыя спаборніцтвы неафіцыйным чэмпіянатам свету. Аднак, яшчэ адным важным складальнікам турніру з'яўляецца яго непаўторная атмасфера, у калядныя дні арэны на матчах перапоўненыя - свята хакея, традыцыйна, аб'ядноўвае ўсіх прыхільнікаў гэтай гульні. Цырымонія адкрыцця спаборніцтваў з удзелам Кіраўніка дзяржавы на "Чыжоўка-Арэне" завяршылася літаральна гадзіну таму, а ў гэтыя хвіліны на месцы падзей працуе наш спартыўны аглядальнік - Станіслаў Ліпскі.
Найбліжэйшыя дні жывём хакеем - напярэдадні практычна ўсе госці 13 Каляднага турніру прыехалі ў Мінск. Напэўна, бачылі, як сталічнае "Дынама" ў КХЛ абгуляла лідара сезона СКА 5:4, а сёння ўжо самі выйшлі на лёд сталічнай "Чыжоўка-Арэны". Менавіта тут сёлета пройдуць усе матчы турніру. Атмасфера, як заўсёды, святочная.
Два дзённыя матчы ўжо завяршыліся. На малой арэне каманда Фінляндыі не пакінула шанцаў Германіі 13:2, адзначым, хет-трык нападаючага Тоні Макіяха. На вялікай арэне ледзь пазней у нашай групе зборная Швейцарыі справілася з дэбютантамі турніру - камандай Балкан - 4:2. Адзначым, у яе складзе прадстаўнікі адразу 8 суверэнных дзяржаў. У яшчэ адным паядынку расіяне абгулялі славакаў 3:1. А прыкладна гадзіну таму 13 Калядны турнір на прыз Прэзідэнта Беларусі афіцыйна абвясцілі адкрытым. У маляўнічай цырымоніі, якая доўжылася парадку 30 хвілін, галоўны акцэнт быў зроблены на калядныя чароўныя святочныя дні, якія вось ужо як 13 год запар у Беларусі праходзяць пад акампанемент удараў клюшак і лозунгі аматараў хакея, антураж непаўторны.
Традыцыйна адкрыў турнір, уласна як і спартыўны год у нашай краіне, Кіраўнік дзяржавы. А адразу пасля цырымоніі адкрыцця арганізатары прыхільнікам турніру падрыхтавалі галоўны матч першага дня турніру: каманда Прэзідэнта - дзевяціразовы трыумфатар спаборніцтваў - іспытвае каманду Аб'яднаных Арабскіх Эміратаў. Зразумела, аншлаг сустрэчы забяспечаны.
Такім чынам, першы перыяд паядынку каманды Прэзідэнта супраць каманды ААЭ набліжаецца да экватара - наша дружына ўжо выйграе. Тым жа, хто сёння не змог трапіць на трыбуны "Чыжоўка-Арэны", нагадаем: уваход абсалютна на ўсе гульні турніру бясплатны
Белтэлерадыёкампанія падрыхтавала трансляцыю сустрэчы на тэлеканале "Беларусь 5". Яна стартуе ў 20:05. Не прапусціце. Яшчэ больш аб Калядным турніры мы раскажам у "Панараме" у 21:00.
