Выдатная адвольная праграма ў выкананні Соф'і Самадуравай дазволіла расіянцы выйграць золата чэмпіянату Еўропы па фігурным катанні ў жаночым адзіночным разрадзе. Наваспечаная чэмпіёнка набрала амаль 214 балаў і значна апярэдзіла алімпійскую чэмпіёнку Аліну Загітаву, якая ў выніку стала другой.
Турнір, які выйшаў за рамкі сур'ёзнага спартыўнага спаборніцтва. Чэмпіянат Еўропы па фігурным катанні - першы хатні ў гісторыі Беларусі, маштабны і грандыёзны - пакідае толькі самыя яркія і пазітыўныя эмоцыі ва ўдзельнікаў і гледачоў. Запоўненыя трыбуны "Мінск-Арэны", што стракацяць флагамі розных краін, сведчаць аб тым, што самы прыгожы від спорту прыцягнуў увагу ўсёй Еўропы, для многіх па-сапраўднаму адкрыўшы нашу краіну. Самі спартсмены гавораць пра камфорт і каласальную падтрымку балельшчыкаў.
І ўжо сёння "Мінск-Арэна" развітаецца са спаборніцкай часткай чэмпіянату Еўропы - будуць разыграныя два апошнія камплекты ўзнагарод. Ці атрымаецца Хаўеру Фернандэсу стаць сяміразовым уладальнікам тытула і на мажорнай ноце завяршыць сваю кар'еру? Прамая трансляцыя адвольнай праграмы ў мужчынскім адзіночным катанні пачнецца на "Беларусь 5" у 11:10. У вячэрнім эфіры - за кантынентальнае золата пазмагаюцца танцавальныя пары.
