Беларусам ён медалёў не прынёс, але і ілюзій з нагоды сённяшніх стартаў мы не жывілі. Мужчынскі біятлон, абсалютна нязведаны пакуль шорт-трэк і суперкамбінацыя (гэта горныя лыжы). Сенсацый не здарылася. І беларусы з надзеяй глядзяць у дзень заўтрашні. 18.00. Гонка праследавання. Жаночы біятлон - гэтыя 20 стрэлаў разам з Дар'яй Домрачавай будзе без перабольшання выцэльваць уся краіна. Гэта будзе заўтра.
А пакуль пра мінулыя сённяшнія страты і настрой на аўторак з алімпійскага Сочы - Іван Міхайлаў.
Ці здзівіць Б'ёрндален яшчэ раз спартыўны свет - пытанне пытанняў сёння на алімпійскім біятлонным стадыёне. 40-гадовы ветэран, якога многія спісалі з рахункаў, заўчора сенсацыйна выйграў спрынт, стаў сяміразовым алімпійскім чэмпіёнам, чаму без сарамлівасці радаваўся нібы дзіця. Апетыт, як вядома, прыходзіць падчас ежы, і планы нарвежца на праследаванне былі відавочныя - яшчэ адзін алімпійскі медаль лішнім не бывае.
А вось гоначныя амбіцыі чатырох нашых спартсменаў сёння аб'ектыўна былі куды больш сціплымі - звышзадача - пастарацца палепшыць сваю пазіцыю, бо самы першы з беларусаў стартаваў толькі праз паўтары хвіліны пасля знакамітага нарвежца. Гэтым беларусам быў Уладзімір Чапелін, які пайшоў у пагоню за Б'ёрндаленам з 29 пазіцыі. Сяргей Новікаў - з 33, Яўген Абраменка - з 56 і Юрый Лядаў - з 57.
Няшчасце з Новікавым здарылася яшчэ да першай стральбы. Ён упаў на самім небяспечным павароце трасы, з якім да яго не справіўся ўкраінец Дзерызямля, пасля - канадзец Ле Геек і наш Уладзімір Чапелін. Наогул гонка не задалася для ўсёй каманды. Лепшы з беларусаў - зноў Чапелін. 29 радок ён размяняў на 41-ы, хоць і прамахнуўся ўсяго адзін раз. Новікаў - 50-ы, Абраменка 51-ы. Лядаў 56-ы.
Пераможца спрынту Уле Эйнер Б'ёрндален не змог утрымацца нават у першай тройцы. Сёння ён чацвёрты. Золата ў Мартэна Фуркада, на першае месца ён падняўся з шостай стартавай пазіцыі. Гэта першая алімпійская перамога Мартэна. У Ванкуверы ён узяў серабро ў мас-старце. Бронза персьюта ў яшчэ аднаго француза Беатрыкса. Серабро за чэхам Мораўцам.
Сёння ў Сочы адбылася і гістарычная для Беларусі падзея. Упершыню ў Алімпійскіх спаборніцтвах па шорт-трэку прыняў удзел наш суайчыннік. 22-гадовы Максім Сяргееў стартаваў на дыстанцыі 1500 метраў з кваліфікацыі, на ёй выступленне і скончыў.
У горных лыжах у суперкамбінацыі павінна была стартаваць беларуска Марыя Шканава, але так і не стартавала. Прычына - перабор ФІС-пунктаў. Прасцей гаворачы, ёй не хапіла рэйтынгу для ўдзелу ў Алімпіядзе ў гэтай дысцыпліне. Зрэшты, у гульнях яна яшчэ возьме ўдзел.
Заўтра ў Сочы для нас адзін з галоўных, што датычыцца медыяльных чаканняў, дзён на Алімпіядзе. У 18 гадзін па мінскім часе стартуе біятлонная гонка праследавання ў жанчын. Асноўныя спадзяванні зноў на Дар'ю Домрачаву. Учора беларуска ў спрынце дапусціла адзін промах, заняла 9 месца і будзе стартаваць амаль у 32 секундах за лідарам Анастасіяй Кузьміной. Даша паказала лепшы ход па лыжні і мае выдатныя медыяльныя шанцы. Надзея Скардзіна ўчора была звыкла дакладная і сыйдзе на дыстанцыю 17-ай праз 44 секунды Кузьміной. У мікст-зоне Надзея выпраменьвала стрыманы аптымізм.
Наогул, у дзяўчат добры і баявы настрой. Да іх тут вялізная ўвага, а напярэдадні з імі сустрэўся Аляксандр Лукашэнка. За чаем спартсменкі падзяліліся ўражаннямі аб трасе, на якой пройдуць спаборніцтвы, і аб сваёй падрыхтоўцы да іх. Прэзідэнт падбадзёрыў біятланістак і пажадаў ім поспеху на стартах. Заўтра, акрамя біятлона, беларусы выступяць у лыжным спрынце: Міхаіл Сямёнаў - у мужчын, Валянціна Камінская - у жанчын.
