Своеасаблівы тэлемост праз палову зямнога шара зусім хутка ўбачаць гледачы нашых тэлеканалаў. Да старту галоўных гульняў чатырохгоддзя застаецца літаральна некалькі дзён. Нашы карэспандэнты пакажуць і раскажуць самыя значныя і яркія моманты з алімпійскага Рыа.
Аналітыкі ўжо спрагназавалі вынікі Алімпіяды. Паводле разлікаў спецыялістаў банка "Голдман Сакс", лідарамі агульнакаманднага заліку стануць ЗША, следам у рэйтынгу ідуць Кітай, Вялікабрытанія і Расія. Беларусь, паводле прагнозу, зойме 31 месца. Нашай краіне прадказваюць 12 медалёў, у тым ліку два залатыя. Падобныя алімпійскія рэйтынгі "Голдман Сакс" складае перад кожнымі Гульнямі. Нагадаем, на Алімпіядзе ў Рыа будзе разыграная рэкордная колькасць камплектаў медалёў - 306. Таксама чакаецца ўдзел рэкорднага ліку краін - больш як 200.
Тым часам Бразілія рыхтуецца да цырымоніі адкрыцця Гульняў. Стала вядома, што з-за складанай фінансавай сітуацыі ў краіне цырымонія будзе сціплай, але сучаснай і стыльнай - заявілі арганізатары шоу. Прыкладны бюджэт - 20 мільёнаў долараў. Для параўнання: Лондан у 2012 годзе выдаткаваў на сваё шоу 42 мільёны.