Сёння стануць вядомыя імёны лепшых трэнераў і спартсменаў мінулага года. Вечарам у мінскім Палацы спорту пройдзе грандыёзнае шоу - цырымонія ўручэння прэміі "Трыумф. Героям спорту". У галасаванні ўдзельнічалі больш за паўтара мільёна чалавек. Пераможцаў абвесцяць у 8 намінацыях.
Як выбраць прыдатны гардэроб на ўрачыстую прэмію і дзе ўбачыць тэлеверсію "Трыумфу" - раскажа Андрэй Казлоў.
Пралог урачыстай цырымоніі вызначае тое, якім атрымаецца конкурс "Трыумф. Героям спорту 2014". Дробязяў у такім мерапрыемстве зусім няма.
Яўгенія Чарнышова, старшы выкладчык БДУКМ: "Усе сакрэты мы раскрываць не будзем. У нас ёсць цэнтр нашай кампазіцыі. Гэта сімвал перамогі, волі. Тое, што потым з ёй будзе адбывацца, вы ўбачыце на адкрыцці. У пралогу задзейнічана вельмі шмат людзей, задзейнічана наша зборная па мастацкай гімнастыцы"
"Трыумф-2014" запомніцца і па музычнай прычыне. Яшчэ напярэдадні арганізатары заяўлялі аб жаданні стварыць гімн конкурсу. І сваё слова стрымалі.
Яшчэ да пачатку ўрачыстай цырымоніі зразумела, што сёлетні форум атрымаецца асаблівым. Але галоўныя дзеючыя асобы гэтага свята, вядома, спартсмены. Таму шоу ў Палацы спорту будзе, але каб гледачы не забылі аб трыумфатарах мінулага года, спартсменах, шоу будзе ў меру.
Вядома, што вядучымі "Трыумфу" стануць Дзмітрый Бачкоў і Вольга Рыжыкава. Такі саюз абяцае быць цікавым, таму што Вольга вядзе забаўныя праекты, а Дзмітрый знаёмы гледачам па інфармацыйных праграмах.
Дзмітрый Бачкоў, тэлевядучы: "Вось так і атрымліваецца, што з аднаго боку мы забаўляем, а з другога боку гэта будзе самая моцная навінная інфармацыйная падстава"
Тэлевізійны вопыт у Дзмітрыя Бачкова і Вольгі Рыжыкавай вялізны, але напярэдадні ўрачыстай цырымоніі яны не ўтойваюць свае хваляванні. Бо шмат у чым ад працы вядучых залежыць тое, якім запомняць "Трыумф. Героям спорту" 2014 года.
Вольга Рыжыкава, тэлевядучая: "У нас яшчэ і дэбют такой творчай адзінкі, творчай пары. Мы былі адно ў аднаго ў гасцях, а вось на сцэне разам не працавалі".
Спартыўны конкурс - гэта няпросты выбар, бо годных перамогі спартсменаў летась было нямала. А вось, як выбраць адпаведны гардэроб, раіць Вольга Барабаншчыкава.
Вольга Барабаншчыкава, тэлевядучая: "Мне падабаюцца мужчыны ў касцюмах. Мне здаецца, гэта вельмі прывабна. Камусьці ідзе гальштук, мне вельмі падабаюцца бабачкі. Калі хтосьці з вас сабраўся надзяваць світар, то не".
Больш як тры тысячы гледачоў, лепшыя беларускія спартсмены і спецыялісты, увага ўсіх аматараў спорту. Менавіта сёння і тут, у Палацы спорту, адбудзецца ўрачыстая цырымонія ўзнагароджання пераможцаў конкурсу "Трыумф. Героям спорту 2014". Пачатак у 19 гадзін. Для тых жа, хто не змог трапіць у Палац спорту, тэлеканал "Беларусь 1" рыхтуе трансляцыю, якую вы можаце ўбачыць у 22 гадзіны.