Найбагацейшы расійскі футбольны клуб пабіты! Не перастаюць сёння абмяркоўваць феерычную перамогу мінскага "Дынама" над "Зенітам" з Санкт-Пецярбурга. Напярэдадні каманда Сяргея Гурэнкі на абноўленым стадыёне "Дынама" ў першым паядынку трэцяга раўнда кваліфікацыі Лігі Еўропы не пакінула шанцаў апаненту, разграміўшы "Зеніт" 4:0. Адразу пасля заканчэння матча з перамогай каманду і галоўнага трэнера павіншаваў Кіраўнік дзяржавы, падзякаваў за прыгожую гульню і за тое, што вельмі парадавалі балельшчыкаў. Усе эмоцыі супрацьстаяння сабраў Станіслаў Ліпскі.
Так званая праходка балельшчыкаў "Зеніта" перад матчам супраць мінскага "Дынама" павінна была выразна даць зразумець прыхільнікам "сталічных", што прыехала каманда з Расіі выключна па перамогу. Маўляў, іх клуб у разы больш аўтарытэтны, моцны, багаты і г. д. Таму беларусам лавіць у супрацьстаянні з "Зенітам" няма чаго.
Як следства - парадку 1000 прыхільнікаў паўночнікаў афарбавалі цэнтр сталіцы ў колеры "Зеніта". Піратэхніка, крычалкі і песні эфект патройвалі.
Зразумела, гэты марш быў узгоднены з Мінгарвыканкамам.
Амаль 2,5 тысячы фанатаў у выніку размясцілася ў фан-сектары "Зеніта" на абноўленым "Дынама" - ды вось толькі перадматчавая ўпэўненасць гасцей Беларусі ў перамозе іх роднага клуба памяншалася ў геаметрычнай прагрэсіі. Каманда, у якой гулец сярэдняй рукі за сезон зарабляе гадавы бюджэт, гарэла сінім полымем. А пасля першага тайма, калі лік быў 3:0 на карысць гаспадароў, і зусім апынулася ў шоку. Прапусціўшы чацвёртую прабоіну ў другім тайме, расчараванню балельшчыкаў "Зеніта" мяжы не было.
Выказалася гэта вось у такім пагроме сядзенняў на трыбунах стадыёна. Кіраўніцтва арэны разлічвае на кампенсацыю ад расійскага боку.
"Зеніт" з 1989-га не прайграваў так буйна ў еўракубках. Тады ў Кубку УЕФА каманда з Санкт-Пецярбурга прайграла "Штутгарту" 0:5.
Першы матч трэцяга кваліфікацыйнага раўнда Лігі Еўропы паміж мінскім "Дынама" і "Зенітам" наведалі 21700 гледачоў. Паядынак стаў самым наведвальным для "Дынама" ў еўракубках за апошнія 30 гадоў. Прэзідэнт Беларусі павіншаваў сталічны клуб з такой феерычнай перамогай.
Адзначым, 16 жніўня ў паядынку ў адказ на стадыёне ў Санкт-Пецярбургу наогул балельшчыкаў не будзе з-за дысцыплінарнага рашэння УЕФА.
Дадам, забіўшы 4 мячы "Зеніту", мінскае "Дынама" ўвайшло ў топ-5 самых выніковых каманд бягучага розыгрышу Лігі Еўропы, у актыве "сталічных" 14 дакладных удараў, больш толькі ў "Слована" і "Хіберніяна" - 15 і 16 адпаведна.
