Чэмпіянат свету па футболе завяршыўся, але распачаўся еўракубкавы сезон. У матчах кваліфікацыі Лігі Еўропы і Лігі чэмпіёнаў прымаюць удзел чатыры беларускія клубы, тры з якіх прадстаўляюць Мінскі раён: "Шахцёр", БАТЭ і мінскае "Дынама". Падрабязнасці ў рубрыцы "Матчбол".
Дзве беларускія каманды выйшлі ў другі раўнд кваліфікацыі футбольнай Лігі Еўропы. І мінскае "Дынама", і салігорскі "Шахцёр" перамаглі сваіх сапернікаў па выніку дзвюх сустрэч. Аднак для сталічнага клуба матч на хатняй арэне атрымаўся неадназначным.
Адразу пасля фінальнага свістка галоўны трэнер мінскага "Дынама" Сяргей Гурэнка шмат часу размаўляе з абаронцам сваёй каманды Максімам Жаўнерчыкам.
Антураж тым часам стаў вельмі значным. "Дынама" вяртаецца на тую арэну, дзе 35 гадоў таму станавілася чэмпіёнам у розыгрышы Савецкага Саюза. Пасля шасці гадоў рэканструкцыі гульня супраць ірландскага "Дэры Сіці" - першая афіцыйная. Мінчане саступаюць саперніку, але ў другі раўнд выходзяць: тыдзень таму беларусы перамаглі 2:0.
Адразу пасля завяршэння матча ў Мінску салігорскі "Шахцёр" на сваім стадыёне прымаў клуб з Уэльса. І вось тут беларускія футбалісты відавочна былі лепшымі 2:0. З трыбун здавалася, што да нас у госці прыехаў аматарскі клуб. Але ў Салігорску так не лічаць.
Барысаўскі БАТЭ працягвае перамагаць пад кіраўніцтвам Аляксея Багі. Чэмпіёны краіны ўпэўнена адчуваюць сябе ў нацыянальным першынстве. Але наперадзе галоўнае - кваліфікацыя Лігі чэмпіёнаў.
Футбольны клуб "Мінск" змагаўся, але ўсё ж такі ні разу не забіў у вароты Дзяніса Шчарбіцкага - варатар БАТЭ зноў гуляе на нуль. У барысаўчан вызначыліся галамі Максім Скавыш і Мірка Іваніч. Галоўная з'ява гэтага матча - вяртанне ў БАТЭ абаронцы нацыянальнай зборнай Ягора Філіпенкі.
Адкрыты пасля рэканструкцыі стадыён "Дынама" дэманструе сваю шматфункцыянальнасць. Праз дзень пасля футбольнага матча тут адбыўся чэмпіянат краіны па лёгкай атлетыцы. Для многіх спартсменаў гэтыя спаборніцтвы вырашальныя ў барацьбе за месца на чэмпіянат Еўропы. Але ў кіданні кап'я ў Таццяны Халадовіч канкурэнтаў няма. Яе вынік - упэўнена лепшы з усіх спартсменаў.
Чэмпіянат Еўропы па лёгкай атлетыцы пройдзе з 7 па 12 жніўня ў Берліне.
Вяртаемся да футбола, таму што на гэтым тыдні барысаўскі БАТЭ распачне шлях у самым папулярным клубным турніры Еўропы. Наш чэмпіён стартуе ў другім раўндзе Лігі чэмпіёнаў. 25 ліпеня трэба быць на "Барысаў-Арэне".
