Спартыўная рубрыка "Матчбол" працягвае алімпійскую тэму пераможных выступленняў нашых атлетаў на мінулым тыдні. Золата Ганны Гуськовай у фрыстайле і серабро Дар'і Домрачавай у біятлоне. Спартсменкі на п'едэстале, і іх эмоцыі - у нашым эфіры. А пачынаем са спаборніцтваў, якія прайшлі ў Мінску.
Мінск упершыню ў сваёй гісторыі прыняў буйны міжнародны турнір па сквошы. Удзельнікі з 20 краін, больш за 200 гульцоў. Спаборніцтвы прайшлі ў 15 катэгорыях. Адзначу, што зараз сквош прэтэндуе на тое, каб стаць паказальным відам на Еўрапейскіх гульнях, якія пройдуць у Мінску ў наступным годзе.
Наступная планка для сквоша - Алімпіяда ў Токіа.
Перамогу ж на спаборніцтвах святкавалі прыезджыя сквашысты. У мужчын - П'едра Швеертман з Нідэрландаў, сярод жанчын трыумфатарам стала латышка Інэта Мацкевіч.
А вось беларускі трыумф. 16-га лютага, першы медаль нашай каманды на Алімпіядзе. І адразу найвышэйшай пробы.
25-гадовая мінчанка Ганна Гуськова - лепшая ў спаборніцтвах па фрыстайле.
А за крок ад бронзы Пхёнчхана спынілася алімпійская чэмпіёнка Сочы Ала Цупер. Суддзі паставілі вышэйшую адзнаку атлетцы з Кітая, што выклікала шмат пытанняў...
На наступны дзень разгарэўся скандал. Незразумелыя судзейскія рашэнні пакінулі без фіналу пераможца Алімпіяды ў Сочы Антона Кушніра. У лік 12 лепшых фрыстайлістаў трапіў толькі Станіслаў Гладчанка - самы малады ўдзельнік ад Беларусі. Ён дабраўся да суперфіналу, але заняў там шостае месца.
А зараз зноў вернемся ў "Алімпік Плазу", дзе спартсмены атрымліваюць заслужаныя медалі.
Цяпер у скарбонцы Дарь'і Домрачавай ёсць медаль кожнай пробы. Бронза Ванкувера, золата Сочы і серабро Пхёнчхана. Другой зорка беларускага біятлону фінішавала ў гонцы з масавым стартам.
Таксама высокае - сёмае месца - у гэтай гонцы заняла наша Надзея Скардзіна.
Да закрыцця Алімпійскіх гульняў застаецца яшчэ тыдзень. Медальныя віды для беларусаў ужо скончыліся. Але заўсёды ёсць месца сюрпрызам. Так, у Пхёнчхане пройдуць яшчэ тры эстафеты – змяшаная, жаночая і мужчынская. Таксама беларусы выступяць у гарналыжным і канькабежным спорце. Вынікі будзем падводзіць у наступны панядзелак.
