Праблем са снегам няма, а падрыхтоўка ўвайшла ў завяршальную стадыю.
Раўбічы жывуць чаканнем юніёрскага чэмпіянату свету па біятлоне. Ён, нагадаем, стартуе 17 лютага. Калі тыдзень таму арганізатары ў сувязі з адлігай падумвалі аб гіпатэтычным завозе снегу з аэрапорта, то зараз гэты варыянт не разглядаецца, атрымліваецца спраўляцца самастойна. Хапае працы і трэнерскаму штабу, які разумее, што на хатнім турніры ад каманды чакаюць добрага выніку.
Рэпартаж Андрэя Іванова. Погляд чалавека, які прыехаў у Раўбічы ўпершыню за доўгі час, чапляецца абсалютна за ўсё. Новыя ўчасткі трасы, трыбуны, стрэльбішча, цір, табло, вакс-кабіны, гасцініца, калі каротка, то…
Аляксандр Сыман, старшы трэнер юніёрскай зборнай Беларусі па біятлоне: "Комплекс сусветнага ўзроўню, адзін з лепшых, пэўна. Даставіць радасць балельшчыкам, якія прыедуць сюды".
Падстава прадставіцца зусім хутка. Першую праверку - чэмпіянат Беларусі па біятлоне - Раўбічы прайшлі, другая будзе больш "скрупулёзнай": чэмпіянат свету, хай і юніёрскі, дасць адказы на шматлікія пытанні.
Наогул, лепш за ўсё за гэты комплекс скажуць лічбы: дык вось у дні турніру ў Раўбічах будуць знаходзіцца каля 700 спартсменаў з 42 краін. Дадатковую нагрузку створаць балельшчыкі, комплекс адначасова гатовы прыняць 2500 - 3000 гледачоў - паказчыкі Руполдынга або Кантыялахці, дзе штогод праходзяць этапы Кубка свету.
Галоўнае пытанне: ці хопіць снегу - ужо не стаіць, распавядае намеснік дырэктара спарткомплексу Леанід Карась. "Падушку" трасы сфарміравалі цалкам, застаўся ўчастак насупраць трыбуны. Зараз працуюць 3 гарматы, якія за хвіліну вырабляюць машыну штучнага снегу.
Беларускі біятлон для радавога балельшчыка асацыюецца ў першую чаргу з Дар'яй Домрачавай. Зрэшты, у трэнераў ёсць велічэзнае жаданне прадэманстраваць, што за спіной Героя Беларусі ёсць таленавітыя спартсмены.
Аляксандр Сыман, старшы трэнер юніёрскай зборнай Беларусі па біятлоне: "Падрыхтоўка вядзецца сур'ёзная Усё, што датычыцца арганізацыйных момантаў, правядзення збораў - тут усё было зроблена".
