Рэканструяваны спарткомплекс "Раўбічы" рыхтуецца да першага вялікага выпрабавання - у другой палове лютага тут пройдзе чэмпіянат свету па біятлоне сярод юніёраў. Заяўкі на ўдзел падалі ўжо 42 краіны. Сёння на лыжні праходзіў чэмпіянат рэспублікі - гэта апошні адборачны этап для маладых беларускіх біятланістаў.
З Раўбіч рэпартаж Паўла Капуцкага.
Каб снегу не было мала. Гэта зараз галоўны галаўны боль арганізатараў чэмпіянату свету. Каля трас стаяць тры снежныя гарматы. Хутка прыедуць яшчэ дзве, але, што толку, калі працаваць яны могуць толькі пры тэмпературы мінус 7. Або хоць мінус 5. А пакуль у Раўбічах каля нуля.
Шырыня трасы па нормах - 6 метраў. Таўшчыня ўтаптанага снежнага покрыва павінна быць не менш як 30 сантыметраў. Калі ўлічваць снег, які выпаў, - гэта менш як 10 сантыметраў. Вядома, нарыхтаваны штучны снег. Па сваіх якасцях ад натуральнага ён амаль не адрозніваецца. Але пакуль і яго недастаткова.
Юрый Альберс, старшы трэнер зборнай Беларусі па біятлоне: "Калі нічога не будзе паляпшацца, значыць будзем вазіць снег. Мы ўвайшлі ў кантакт з мінскім аэрапортам, і той снег, які з узлётнай паласы яны прыбіраюць, снег там чысты, той снег будзем вазіць сюды, калі ён не пойдзе або тэмпература высокая. Так што, гэта пакуль самае хворае месца".
Урачы, масажысты, біяхімікі і нават сэрвіс-група на чале з нарвежцам Іварам Улеклейвам. На нашых юніёраў падчас чэмпіянату будзе працаваць штаб дарослай зборнай, у якой як раз паўза ў календары паміж этапам у Халменколене і чэмпіянатам свету ў Кантыялахці.
Дар'я Блашко, пераможца юніёрскага чэмпіянату Беларусі па біятлоне: "Трэнеры, вядома, і кіраўніцтва чакаюць высокага выніку. Такім чынам, і мы паспрабуем усё зрабіць, рыхтаваліся сезон цэлы. Таму павінны добра выступіць. Добрая была падрыхтоўка, шмат збораў было, якасна правялі ўсю працу".
Дар'я сёння стала першай на рэспубліканскім старце і кваліфікавалася на хатні чэмпіянат. Цёзка-Домрачава - для яе арыенцір, і трэнеры вераць, што ў малодшай Дашы ўсё можа атрымаецца.
Будучыя Домрачавы, Нойнеры, Б’ёрндалены і Пуарэ ўжо думаюць аб Раўбічах. У Беларусь прыедуць каля 500 маладых спартсменаў. Трэнеры, медыкі, абслуговы персанал - гэта яшчэ 200 чалавек. Частка гасцей размесціцца ў гасцініцах самога спарткомплексу. Астатнія будуць жыць у Мінску. Маладыя зоркі сусветнага біятлона барацьбу за медалі юніёрскага чэмпіянату свету пачнуць 17 лютага. Скончаць 24-га.
