Вердыкту пакуль няма, але прагноз - пазітыўны. Прадстаўнікі мужчынскай зборнай Беларусі па веславанні на байдарках і каноэ сёння ўначы вярнуліся са Швейцарыі. У Лазане прайшло пасяджэнне спартыўнага арбітражнага суда.
Павел Капуцкі сустракаў нашу дэлегацыю. Уладзімір Шантаровіч бачыць здымачную групу "Беларусь 1" і адразу ідзе да камеры. За апошнія месяцы галоўны трэнер зборнай шмат перажыў і маўчаць не можа.
Сямігадзіннае пасяджэнне змясціла шматлікае. Сеанс сувязі з вынаходцам мельдонія Іварам Калвіншам, напрыклад. Менавіта ва ўжыванні гэтага прэпарата вінавацілі нашых весляроў.
Зараз у дачыненні мужчынскай каманды дзейнічае гадавая дыскваліфікацыя. На чэмпіянаце свету ў жніўні наступнага года нашы хлопцы ў любым выпадку выступяць. Але не ўсе. Аляксандр Багдановіч з-за скандалу кар'еру скончыў раней, чым планаваў.
Нацыянальны алімпійскі камітэт, юрысты, урачы, трэнеры і спартсмены зрабілі ўсё. Застаецца чакаць.
Рашэнне спартыўны арбітраж Лазаны аб’явіць у найбліжэйшыя тыдні.
