На старт, увага, марш! Каля 35 тысяч удзельнікаў прабягуць па найпрыгажэйшых месцах нашага горада ўжо заўтра. Мінск чакае яркую і маштабную міжнародную падзею - 4-ы Мінскі паўмарафон. Спартсмены, медыяперсоны, беларускія зоркі і проста прыхільнікі здаровага ладу жыцця пераадолеюць выбраныя дыстанцыі за неабходны час. Кожны ўдзельнік атрымае медаль, а лепшыя яшчэ і грашовыя прызы ад арганізатараў. Балельшчыкаў чакаюць падарункі за самы крэатыўны касцюм і плакат.
Вадзім Дзевятоўскі, старшыня Беларускай федэрацыі лёгкай атлетыкі: "Заўтра мы ўсіх запрашаем на наша свята бегу. Гэта доўгачаканая падзея, шматлікія, не саромеючыся, адзначаюць, што для іх гэта чырвоны дзень календара. Гэта будзе не толькі бег, гэта і спартыўныя, і музычныя мерапрыемствы, тэатралізаваныя паказы, спартыўныя міні-пляцоўкі, якія будуць падтрымліваць удзельнікаў паўмарафону. Таксама балельшчыкі, якія будуць знаходзіцца побач, змогуць атрымаць масу незабыўных эмоцый. Мы ім гэта абяцаем".
На паўмарафон ужо зарэгістравалася больш за тысячу іншаземцаў з 50 краін свету, у тым ліку з-за прадаўжэння тэрміну бязвізавага знаходжання ў нашай краіне. Першы старт на самую доўгую дыстанцыю будзе дадзены ў 9 раніцы на праспекце Пераможцаў. У 9:45 - другі. Самы масавы забег на 5 з паловай кіламетраў пачнецца ў 12:30. Пасля падвядзення вынікаў конкурсу, аб’яўленага Беларускай федэрацыяй лёгкай атлетыкі, будуць выбраны "Міс і містар Мінскага паўмарафону 2018".
