Яркае спартыўнае свята ўсё бліжэй, агонь II Еўрапейскіх гульняў аб'яднаў усе рэгіёны краіны. Сёння “Полымя міру” сустракалі жыхары Мінскай вобласці. Па шляху галоўнага сімвала будучага форуму прайшла і наша здымачная група.
Расказвае Наталля Кузьміцкая: Ад волатаў, кар'ерных самазвалаў, да вялікіх інавацый Кітайска-беларускага індустрыяльнага парка. "Вялікі камень" сёння падхапіў эстафету перадачы агню II Еўрапейскіх гульняў. Сімвалічны камень індустрыяльнага парка быў закладзены ў 2014 годзе. Праз 5 гадоў на карце Мінскай вобласці літаральна вырас цэлы горад. "Полымя міру" пранеслі па галоўных вуліцах і праспектах інавацыйнага мегаполіса.
Ад Мінскага праспекта да Пекінскага ўзначальваў калону рэктар БНТУ Сяргей Харытончык. Студэнты гэтай ВНУ рыхтуюцца сустрэць спартыўны форум не толькі ў якасці валанцёраў, але і выйсці на старты ў складзе нацыянальнай зборнай. Сустракалі факеланосцаў ля галоўнага адміністрацыйнага будынка "Вялікага каменя" прадстаўнікі ўсіх 44 кампаній-рэзідэнтаў парка.
Наступны прыпынак на шляху "Полымя міру" - на паўночны ўсход ад сталіцы. Тут каманду захавальнікаў агню чакала вялікая група падтрымкі з Лагойска. Свой шлях агонь II Еўрапейскіх гульняў прадоўжыў па цэхах флагмана раёна - вытворца лесанарыхтоўчай тэхнікі ў руках Аляксандра Ягорава - прадстаўніка найбуйнейшага банка краіны і нацыянальнага партнёра кантынентальнага першынства. У працэсе падрыхтоўкі да Гульняў каманда Беларусбанка рэгулярна прымала ўдзел у дружалюбных турнірах праекта Bright Team. І працягвае спонсарскую падтрымку шэрагу спартыўных ініцыятыў.
Завяршыўся дзень на памятным для беларусаў месцы - у мемарыяльным комплексе "Хатынь". Промні спартыўнага агню і агню памяці зліліся ў адно "Полымя міру". Ужо заўтра яго даставяць у культурную сталіцу Мінскай вобласці - горад Маладзечна.