Галоўная апошняя спартыўная навіна, якая стала трыумфальнай для беларускага тэніса. Арына Сабаленка правяла фантастычны турнір катэгорыі "Прэм'ер" у амерыканскім Нью-Хейвене і не толькі стала найлепшай, нягледзячы на вялікую колькасць топ-тэнісістак, а і трэцяй беларускай (пасля Зверавай і Азаранкі), якая выйграла спаборніцтва ў адзіночным разрадзе.
Калі ў спорце ўсё здараецца ўпершыню, то мае вялікую каштоўнасць. Мы да гэтага часу ўспамінаем дэбютны трыумф Вікторыі Азаранкі ў аўстралійскім Брысбене. Таксама праз шмат гадоў успомнім і перамогу Арыны Сабаленкі. Яна на сёння першая ракетка Беларусі, а з панядзелка ўвойдзе ў топ-20.
Гульня супраць 30-ай ракеткі свету, іспанкі Карлы Суарэс Навары, стала, можа быць, не самай складанай у Нью-Хейвене. Але прыкметна тое, што з кожнай сустрэчай Сабаленка прагрэсіравала. Аб якіх тактычных паказчыках варта гаварыць, калі беларуска аддала саперніцы ўсяго пяць геймаў. Два сэты, 6:1, 6:4.
Хай гэта сказана гучна, але было б несправядліва, калі б Арына не выйграла тытул на турніры ў Нью-Хейвене. Яна праводзіць выдатны сезон, на спаборніцтвах у Цынцынаці дайшла да паўфіналу, а ўжо на кортах апошняга перад US Open турніру паказвала характар у кожнай сустрэчы, гуляючы пры гэтым з больш тытулаванымі тэнісісткамі.
Фактарам прагрэсу Сабаленкі называюць і асабістага трэнера Дзмітрыя Турсунова, які працуе з беларускай параўнальна нядаўна.
Ён уваходзіў у топ-20 рэйтынг ATP, і ўвогуле правёў добрую кар'еру, але вырашыў сканцэнтравацца на трэнерскай дзейнасці і не пралічыўся.
Пасля гульні Карла Суарэс-Навара дзякавала сваёй камандзе, але адзначала выдатны тэніс у выкананні сваёй саперніцы. У вялікім спорце няпроста прызнаць перавагу апанента. Наперадзе Адкрыты чэмпіянат ЗША па тэнісе, які для нашых спартсменак абяцае быць вельмі захапляльным.
