Мы працягваем вас падрабязна знаёміць з героямі і відамі спорту будучай зімовай Алімпіяды. І сёння гаворым пра хакей. Толькі ўявіце, 193 кіламетры за гадзіну. Гэта магчымая хуткасць палёту шайбы. Каб зрэагаваць на кідок, у варатара ёсць 0,45 секунды. Цікава і тое, што самая буйная перамога ў гульні належыць гаспадарам будучай Алімпіяды - зборнай Паўднёвай Карэі. Паядынак супраць Тайланда на юнацкім чэмпіянаце Азіі завяршыўся з лікам 92-0. Такім чынам, усё самае цікавае пра самы папулярны зімовы від спорту прама зараз у праекце "Алімпійская віза".
Расказвае Станіслаў Ліпскі.
Хакей - камандны зімовы від спорту № 1. І справа тут не толькі ў відовішчнасці гульні. З дапамогай лапаты для ачысткі снега марознай зімой на любой рацэ або возеры вельмі проста арганізаваць лядовую пляцоўку. А спартыўны інвентар - канькі, клюшку і шайбу - сёння можна знайсці ў кожным буйным магазіне.
Г.з. даступнасць, дэмакратычнасць, неверагодная энергія і прыгажосць гэтай гульні ў сукупнасці і зрабілі хакей адным з самых папулярных відаў спорту планеты.
Родапачынальнікамі хакея лічацца канадцы. У 1879 былі сфармуляваны правілы хакея, а ўжо праз 6 гадоў у Манрэалі была заснавана Аматарская хакейная асацыяцыя. Гульня хутка атрымала сусветнае прызнанне - у 1908 прайшоў першы кангрэс ІІХФ, а ў 1920 хакей з шайбай быў уключаны ў праграму Алімпійскіх гульняў.
З часам хакейнае супрацьстаянне Канады і СССР стала самым яркім у XX стагоддзі, успамінае член залы славы ІІХФ Філ Эспазіта. У матчавай сустрэчы паміж гэтымі камандамі ў 1972 форвард стаў лепшым бамбардзірам, але сёння ён разважае аб папулярнасці гэтага віду спорту.
Дарэчы, згодна са справаздачай ІІХФ, якая ўлічвае як крытыя, так і адкрытыя хакейныя каткі, больш за ўсё такіх у Канадзе, на другім месцы - Расія, на трэцім - ЗША. У Беларусі 41 лядовы каток. Г.з. 4,42 арэны прыпадаюць у разліку на 500 тысяч жыхароў нашай краіны. І гэты паказчык вышэйшы, чым у Расіі, Германіі або Славеніі.
Дарэчы, менавіта славенцы не пусцілі Беларусь на Алімпіяду ў Пхёнчхан. Выступленне ў 2002 на галоўным зімовым старце чатырохгоддзя ў Солт-Лейк-Сіці, дзе мы сталі чацвёртымі, сенсацыйна абгуляўшы Швецыю (4-3), пакуль застаецца для нас самым удалым у суверэннай гісторыі.
Уладзімір Цыплакоў, галоўны трэнер ХК "Шахцёр" (Салігорск): "Цікава, але факт. Упершыню хакейную маску галкіпер стаў выкарыстоўваць толькі ў 1929. Сёння яна надзейна абараняе твар варатара. Толькі ўявіце, у яго ёсць усяго 0,45 секунды, каб зрэагаваць на кідок, зроблены з 18 метраў. Дарэчы, вага шайбы - 200 грамаў. Перад гульнёй яе абавязкова астуджаюць, каб не спружыніла. Максімальна магчымая зафіксаваная хуткасць палёту шайбы ў гульні - 193 кіламетры за гадзіну".
На Алімпіядзе ў Пхёнчхане хакеісты згуляюць на пляцоўцы еўрапейскага ўзору. Яе памеры - 61 на 30. Больш чым паўночнаамерыканскі варыянт, але, як паказвае практыка, відовішчнасць гульні з-за гэтага не горшая.
А яшчэ хакей аб'ядноўвае. У Лазане падчас сустрэчы дэлегацый нацыянальных алімпійскіх камітэтаў Паўднёвай Карэі і Паўночнай з прадстаўнікамі МАКа была падпісана дэкларацыя аб удзеле КНДР у будучай Алімпіядзе. Больш за тое, алімпійцы з дзвюх суседніх краін на Гульнях у Пхёнчхане выступяць адзінай дружынай у жаночым хакейным турніры. Змяшаная карэйская каманда будзе складацца з 23 прадстаўніц Паўднёвай Карэі і 12 - КНДР.
А вось НХЛцаў у Пхёнчхане не будзе. Пра гэта камісар Лігі Гары Бэтмен афіцыйна заявіў яшчэ ў канцы мая. У выніку не ўбачым у Паўднёвай Карэі Кросбі, Малкіна, Авечкіна, Кейна, братоў Сядзінаў. Усе зборныя будуць складзеныя з хакеістаў, што выступаюць у Еўропе. Мінскае "Дынама" прадставяць: у ростары Канады - Марк-Андрэ Граньяні і Куінтаў Хаўдэн, у складзе Швецыі перажываць будзем за Юнаса Энрота.
Дарэчы, пра шанцы. На Алімпійскіх гульнях выступіць 12 каманд, яны падзеленыя на 3 групы. У чвэрцьфіналы на прамую выйдуць пераможцы квартэтаў і адна лепшая з тых, хто заняў другія месцы. Астатнія пазмагаюцца ў кваліфікацыі плэй-оф за права апынуцца ў 1/4.
Да гэтага 9 разоў на Алімпіядах не было роўных Канадзе, 8 - СССР, а затым і зборнай Расіі, па два разы забіралі залатыя медалі Гульні шведы і амерыканцы.
Дагнаць родапачынальнікаў хакея па колькасці трыумфаў на алімпіядах камандзе з Расіі сёлета па сілах, лічаць спецыялісты. Але з-за допінгавых скандалаў МАК не дапусціў да ўдзелу ў турніры Андрэя Бялова, Валерыя Нічушкіна, Сяргея Плотнікава. А калі ўлічыць адсутнасць НХЛаўцаў, то перамагчы нашым усходнім суседзям будзе няпроста.
Такім чынам, алімпійскі хакейны турнір у Пхёнчхане стартуе 10 лютага сярод жаночых зборных і 14-га сярод мужчынскіх. Імёны чэмпіёнаў даведаемся 22 і 24 лютага адпаведна.
