На Алімпіядзе тыдзень даставіў нам адразу некалькі незабыўных момантаў. Спачатку золата ў жаночым фрыстайле Ганны Гуськовай, затым серабро ў біятлонным мас-старце Дар'і Домрачавай.
“Алімпійскі дзённік” на "Беларусь 1" паказаў першае інтэрв'ю нашай чэмпіёнкі Ганны Гуськовай. Але пакуль фрыстайлістка, якая калісьці марыла стаць журналістам, трохі саромеецца тэлекамер. Таму наш карэспандэнт Яўген Перлін зняў у незвычайным трохі для тэлебачання фармаце відэаблогу, як праходзіла падрыхтоўка да першага інтэрв'ю Ганны ў рангу алімпійскай чэмпіёнкі.
Гэта і не толькі глядзіце зараз.
Зараз Ганна патрапіць у студыю "Алімпійскага дзённіка". Мара дзяцінства, якая стала трыумфам для ўсёй Беларусі. Да гэтай перамогі ішла спартсменка, трэнер, уся каманда і краіна!
Першы медаль на Алімпіядзе ў Пхёнчхане - і адразу золата ў самым залатым для беларусаў відзе спорту.
20 гадоў нашы атлеты не пакідаюць п'едэстал без флага і гімна нашай краіны. Калі прастуда і тэмпература пад 40, калі вецер змяняе ўсе планы, трэба сабрацца і зрабіць тое, дзеля чаго жыў і трэніраваўся доўгія гады.
Скачок на найскладанейшым трампліне… і замер увесь "Фенікс-Парк".
Гэта перамога. Беларускага фрыстайлу. Традыцый. І волі нашай спартсменкі!
Літаральна праз некалькі хвілін тут з'явіцца алімпійская чэмпіёнка. Ганна Гуськова - сустракаем яе першымі. А вось і яна! Вось ён медаль, а ўсмешка якая!
П'едэстал даў пра сябе ведаць, і сляза прабілася. Для журналістаў вялікі поспех і добрая прыкмета - першым узяць у рукі залаты медаль Алімпіяды.
Ганна Эйсмант аказалася першай, хто патрымае беларускі медаль. Ён важыць 589 грамаў. Вікіпедыя нам дапамагла!
Дня Ганны Гуськовай правялі экскурсію па алімпійскім офісе Белтэлерадыёкампаніі.
Пакуль Гуськову рыхтуе да эфіру наш прафесійны візажыст, тут нашы калегі хварэюць за біятлон.
Каментаваў мас-старт у жанчын Уладзімір Навіцкі.
Гутарка ў студыі "Алімпійскага дзённіка" працягвалася гадзіну, і гледачы "Беларусь 1" першымі ўбачылі эмоцыі ад трыумфатара з Беларусі Ганны Гуськовай.
Фота разляцелася па Інтэрнэце адразу ж пасля таго самага жаночага мас-старту! Трохразовая алімпійская чэмпіёнка, Герой Беларусі і яе муж - васьміразовы чэмпіён - радуюцца перамозе. Гэта тое серабро, якое даражэйшае за золата! Пасля нараджэння дачкі Дар'я Домрачава вярнулася ў цудоўную форму і заняла годнае месца на п'едэстале.
Выдатная хуткасць на дыстанцыі і ўменне сабрацца - амаль чыстая стральба. Той фатальны промах пазбавіў шанцаў на барацьбу за золата. Гэта была сапраўдная спартыўная злосць пасля трох няўдалых гонак - і феерычны фініш.
Такім чынам, Беларусь на 15-м месцы ў медальным заліку. Золата ў фрыстайле і серабро ў біятлоне. Наперадзе жаночая эстафета ў чацвер і новыя алімпійскія надзеі, вынік якіх будзе немагчыма аспрэчыць! Хварэем усёй краінай!
