На Алімпіядзе сёння беларускія спартсмены прымуць удзел у пяці медальных дысцыплінах. І, вядома, у першую чаргу чакаем удалага выступлення нашых лыжных акрабатаў. Учора фрыстайлісткі паспяхова кваліфікаваліся ў фінал. А вось у біятланістак ізноў не атрымалася падняцца на п'едэстал.
Усе падрабязнасці ў нашага карэспандэнта Ганны Эйсмант. У шосты спаборніцкі дзень Алімпіяды на біятлонным стадыёне "Альпенсія" прайшлі адразу дзве індывідуальныя гонкі - перанесеная жаночая і запланаваная мужчынская.
Праз перанос жаночая гонка адбылася яшчэ пры дзённым святле, і гэта быў, мабыць, першы дзень са старту алімпійскага біятлоннага турніру, калі не выпадала скардзіцца на надвор'е: амаль зацішна, сонечна, - ды і ўспаміны чатырохгадовай даўнасці давалі надзею на добры вынік гонкі для беларусак. Алімпійская чэмпіёнка індывідуальнай гонкі ў Сочы Дар'я Домрачава і тут у Пхёнчхане пачала рэзка, першыя дзве стральбы па нулях, але затым на трэцяй адзін промах, а ў заключнай наогул міма адразу тры!
У выніку трохразовая алімпійская чэмпіёнка фінішавала толькі 27-й. Надзея Скардзіна таксама не змагла паўтарыць свой сочынскі поспех - тут у Пхёнчхане толькі 10-я.
Золата ў шведкі Ханы Эберг, якая закрыла ўсе мішэні. У выніку ў мас-старце, які пройдзе 17 лютага, выступяць тры беларускі: Домрачава, Скардзіна, Крыўко.
У мужчынскай індывідуальнай гонцы золата заваяваў Ёханес Бё, лепшы з беларусаў Сяргей Бачарнікаў - 18-е месца.
Пазітыўныя эмоцыі ўчора прынесла выступленне беларускіх фрыстайлістак. У кваліфікацыі выступала наша трыа: Ала Цупер, Ганна Гуськова і Аляксандра Раманоўская. Пасля першай спробы другая па выніках сезона ў Кубку свету Ганна Гуськова кваліфікавалася ў фінал, алімпійская чэмпіёнка Ала Цупер паспяхова выканала свой другі скачок.
На жаль, Аляксандра Раманоўская ў фінале не выступіць. Фінал у жанчын адбудзецца сёння ў 13:55 - прамая трансляцыя на тэлеканале "Беларусь 5"!
Тым часам на "Канын айс арэне" спаборнічалі фігурысты. За медалі змагаліся спартыўныя пары. Чакалася, што пасля кароткай праграмы барацьба за 1-е месца разгорнецца паміж кітайскімі і расійскімі спартсменамі. Аднак пасля адвольнай золата дасталася зусім іншай пары.
Пасля першага дня лідзіравалі чэмпіёны свету Сун Венцзінь і Хан Кона з Кітая, але ў адвольнай яны дапусцілі крыўднае падзенне. Тая ж недарэчнасць здарылася і ў яшчэ адных прэтэндэнтаў на п'едэстал - расіян Яўгеніі Тарасавай і Уладзіміра Марозава. А вось чацвёртыя пасля кароткай праграмы прадстаўнікі Германіі Алёна Саўчанка і Бруна Маса амаль бездакорна адрабілі адвольную праграму, абнавілі сусветны рэкорд і заваявалі золата! Адзначым, Алёна Саўчанка родам з Украіны, і гэта для яе пятая Алімпіяда, першая была яшчэ ў 2002 годзе. Пасля ўзнагароджання яна з цяжкасцю стрымлівала слёзы!
У выніку серабро ў кітайскай пары, бронза ў канадцаў. Расійская пара Яўгенія Тарасава і Уладзімір Марозаў, якія займалі 2-е месца пасля кароткай праграмы, у выніку толькі 4-я.
Алімпіяда ў Пхёнчхане толькі набірае абароты! Глядзіце яе на каналах Белтэлерадыёкампаніі.
