Галоўныя надзеі беларускіх балельшчыкаў на Алімпіядзе ў Пхёнчхане сёння звязаны з жаночай індывідуальнай гонкай, у якой выступіць чацвёрка нашых спартсменаў на чале з Дар'яй Домрачавай. Тым часам Міжнародны алімпійскі камітэт пачаў асабліва скрупулёзна ставіцца да выгляду спартсменаў розных краін.
Што не спадабалася чыноўнікам МАК, раскажа Вольга Макей. У дні зімовых Гульняў Пхёнчхан ператварыўся ў адну вялікую сям'ю, дзе ў камеру вам можа памахаць сам Пан Гі Мун, а ў госці зазірнуць Томас Бах. Дарэчы, кіраўнік МАК у алімпійскім прэс-цэнтры сфатаграфаваўся са сваім поўным цёзкам, журналістам Томасам Бахам. А пасля наведаўся ў Міжнародны вяшчальны цэнтр, каб паглядзець, як працуюць тэлевізіёншчыкі.
Зразумець прынцыпы працы самога МАК на Гульнях хацелі б многія каманды, бо скандалы толькі памнажаюцца. Напрыклад, алімпійскі камітэт забараніў жаночай зборнай ЗША па хакеі гуляць у шлемах з адлюстраваннем статуі Свабоды, убачыўшы ў гэтым палітычную прапаганду. Зрэшты, надзеўшы іншыя шлемы, з арлом, амерыканкі разграмілі каманду атлетаў з Расіі з лікам 5:0. Прымусілі памяняць шлем з выявай героя Старога запавету Самсона і ізраільскага скелетаніста, палічыўшы адлюстраванне "занадта біблейскім".
Што да беларускіх спартсменаў, то самыя вялікія надзеі сёння на біятланістак. Каля дзвюх гадзін дня па мінскім часе нашы страляючыя лыжніцы выйдуць на старт індывідуальнай гонкі. На гэты момант у Пхёнчхане будзе ўжо вечар. Сіноптыкі пакуль прагназуюць каля мінус 9 градусаў з улікам ветру. Гэта ўдвая ніжэй, чым было падчас пасьюту.
Праўда, вецер, паводле звестак сіноптыкаў, сціхне толькі ў чацвер. Напярэдадні падчас трэніроўкі да моцных парываў дадалася яшчэ і завея. Каб чарговы раз прынаравіцца да стральбы ў няпростых умовах, на стадыён выйшла Надзея Скардзіна. Трэніроўку напярэдадні правяла і Дзінара Алімбекава. Яна заменіць Надзею Пісараву ў індывідуальнай гонцы.
Напярэдадні на сваёй першай Алімпіядзе ў кар'еры заявіў аб сабе 27-гадовы Аляксандр Воранаў. Ён выйшаў у чвэрцьфінал лыжнага спрынту, але ўжо ў паўфінал прабіцца не змог.
Квартэт жаночай лыжнай каманды ў спрынце класічным стылем напярэдадні завяршыў барацьбу на стадыі кваліфікацыі. Юлія Ціханава, Анастасія Кірылава, Паліна Сераносава і Валянціна Камінская не змаглі адабрацца ў топ-30. Гарналыжнік Данілачкін па суме дзвюх дысцыплін (хуткасны спуск і слалам) фінішаваў на 34-й пазіцыі з 62-х.
