У заключныя дні моладзевага чэмпіянату Еўропы па фехтаванні ў Мінску нашы дзяўчаты-саблісткі ўзялі бронзавы медаль у камандных спаборніцтвах. Зараз ужо двухразовыя прызёры гатовыя змагацца за медалі міжнародных стартаў і на дарослым узроўні, а арганізатары кантынентальнага форуму заклікаюць звярнуць увагу на гэты від спорту.
Расказвае Алена Гарэльчык. Эмануэле Рока гарачы, як сапраўдны італьянец. Ён улюбёнец мінскай публікі. Прыгажун-шапажыст выдатна фехтуе - у складзе зборнай выйграў срэбра. З масы спартсменаў вылучаецца адразу.
Для спартсменаў чэмпіянат Еўропы - гэта спосаб праглядзець і адабраць найбліжэйшае папаўненне для нацкаманды. Для арганізатараў - магчымасць разрэкламаваць фехтаванне. Прыцягнуць у спартыўныя секцыі не толькі дзяцей, але і дарослых.
Спецыяльна для чэмпіянату Еўропы былі закупленыя 22 дарожкі і апараты фіксацыі. Агульным коштам каля 100 тысяч беларускіх рублёў. Пасля турніру ўсё гэта будзе перададзена спартшколам. На самым дасканалым працягне трэніравацца нацкаманда.
Голас за кадрам належыць аднаму з самых знакамітых беларускіх мушкецёраў. Дзмітрый Лапкес быў чацвёртым на Гульнях у Афінах.
Жаночая шабля для Беларусі від спорту малады, развіваецца ўсяго 8 гадоў. Але вынік ёсць. Наша каманда зараз ужо двухразовы прызёр моладзевага чэмпіянату Еўропы. Сёння гэтая чацвёрка выйграла бронзу.
Генеральны сакратар Еўрапейскай канфедэрацыі фехтавання Макс Гойтэр прыязджаў у Мінск у далёкім 1970-м. Тады ж у Палацы спорту прайшоў адзін з апошніх для Беларусі турніраў па фехтаванні - юніёрскі чэмпіянат свету. Сёння від спорту на ўзроўні моладзевай Еўропы вяртаецца ў нашу краіну.
Макс Гойтэр, генеральны сакратар Еўрапейскай канфедэрацыі фехтавання: "Вы, вядома, можаце прэтэндаваць на топ-турнір. Да прыкладу, можна падаць заяўку, каб правесці этап Кубка свету. Але, мяркую, наступным крокам для вашай краіны будзе дарослы чэмпіянат Еўропы. І, вядома, наймацнейшых фехтавальшчыкаў кантынента можна будзе ўбачыць на Еўрапейскіх гульнях 2019 года".
