Такім чынам, да пачатку галоўнага старту чатырохгоддзя - 31-х летніх Алімпійскіх гульняў застаецца ледзь больш за чатыры гадзіны. У 2 ночы па беларускім часе пачнецца прамая трансляцыя цырымоніі адкрыцця. Чакаецца, што яе ўбачаць каля 3 мільярдаў гледачоў па ўсім свеце.
Зараз у Рыа завяршаюцца апошнія падрыхтоўкі. Арганізатары цяперашняга сусветнага спартыўнага форуму абяцаюць маляўнічае яркае шоу, праўда, стаўку робяць не на бюджэт, а на стыль і арыгінальнасць свята. Зусім хутка мы зможам гэта ацаніць. Дарэчы, сцэнарый дзейства захоўваецца ў строгім сакрэце. Роўна як дагэтуль застаецца інтрыгай, хто менавіта запаліць алімпійскі агонь на стадыёне. Раней паведамлялася, што гэтага гонару можа быць удастоены Пеле. Аднак легендарны футбаліст нядаўна перанёс аперацыю на сцягне, і ўрачы асцерагаюцца, што моцныя болі могуць перашкодзіць яму выканаць ганаровую місію.
Дарэчы, сам агонь ужо дастаўлены ў алімпійскую вёску. Падчас эстафеты па вуліцах Рыа факел суправаджалі танцоры самбы і паліцэйскія.
Рыхтуюцца да ўдзелу і ў цырымоніі адкрыцця і, вядома, да галоўных стартаў свайго жыцця, нашы атлеты. Працуюць журналісты. Зараз у Рыа знаходзіцца вялікая група Белтэлерадыёкампаніі.
Наш карэспандэнт Станіслаў Ліпскі пабываў у размяшчэнні каманд. Аб духу, пануючым у алімпійскай вёсцы і настроях спартсменаў, яго ўражанні.
Экскурсія па стандартным нумары нашых атлетаў ад прэс-сакратара Нацыянальнага алімпійскага камітэта Анастасіі Марынінай - гэтакі эксклюзіў для Белтэлерадыёкампаніі: толькі афіцыйныя вяшчальнікі Гульняў маюць права зазірнуць у апартаменты алімпійскай вёскі. Менавіта ў такіх нумарах у найбліжэйшыя тры тыдні будуць жыць лепшыя спартсмены планеты.
На гэтай Алімпіядзе беларуская дэлегацыя можа пахваліцца звышсучасным медыцынскім цэнтрам - такога ў суверэннай гісторыі на Гульнях у нас яшчэ не было. Персанал складаецца з 12 чалавек.
Кейлі Дыксан - натуралізаваная амерыканка, якая прадставіць Беларусь у спартыўнай гімнастыцы ў мнагаборстве, родам з Лос-Анджэлеса, таксама не перастае здзіўляцца функцыянальнасці нашай лабараторыі. Разумее давер, аказаны ёй нашай краінай.
Кайлі Дыксан, член зборнай Беларусі па спартыўнай гімнастыцы: "Калі мне прапанавалі выступаць за Беларусь, я ні секунды не сумнявалася, я марыла выступіць на Алімпіядзе. Разумею ўзровень адказнасці - пастараюся выступіць годна".
Максім Рыжанкоў тым часам разам з міністрам спорту ля трэнерскага штаба ўдакладняюць апошнія моманты заключнага этапу падрыхтоўкі да стартаў.
Першым, дарэчы, з нашых землякоў, хто выйшаў на алімпійскую арэну, стаў Антон Прылепаў. Сёння ён выступіў у турніры па стральбе з лука.
Ужо заўтра ў барацьбу за медалі ўступяць нашы ветэраны: Кацярына Карстэн і Уладзімір Самсонаў, аднак мы пакуль чакаем цырымонію адкрыцця Алімпіяды.
