Прыемная навіна сёння прыйшла з Рупальдынга, дзе на этапе Кубка свету па біятлоне завяршылася жаночая індывідуальная гонка. Наша Надзея Скардзіна заваявала Малы хрустальны глобус. Беларусцы не было роўных у агульным заліку індывідуальных гонак. Першую ў Эстэрсундзе, нагадаем, Скардзіна выйграла. Сёння ж Надзея была сёмай, прычым не дапусціла ніводнага промаху. Дар'я Домрачава сёння трапіла ў кветкавую цырымонію - яна шостая.
Усе падрабязнасці з Рупальдынга - у Ганны Эйсмант. Першая жаночая гонка на 5-м этапе падарыла нам шмат станоўчых эмоцый. Домрачава - Скардзіна - першы ў кар'еры Малы хрустальны глобус.
Яшчэ за некалькі гадзін да пачатку гонкі было добрае прадвесце - у афіцыйным фан-шопе на стадыёне мы купілі апошні набор наклеек з беларускім флагам.
Астатнія ўсе раскупілі, нашы балельшчыкі як адчувалі, што сёння беларускі правядуць выдатную гонку. І ўвага не толькі нашай здымачнай групы, але і іншых сусветных інфармагенцтваў была прыкавана да Надзеі Скардзіны - сёння адбылася заключная індывідуальная гонка ў сезоне, і наша біятланістка з невялікім адрывам, але лідзіравала ў заліку індывідуальных гонак. Каб заваяваць Малы хрустальны глобус, Надзі неабходна было сёння чыста адстраляцца і пажадана заняць месца ў першай шасцёрцы! Але выдатна правяла гонку і ўкраінка Юлія Джыма, якая ў заліку зусім мала саступала беларусцы і мела ўсе шанцы сёння яе абысці. Украінка ў выніку фінішавала чацвёртай, Надзя - з сёмым вынікам, і па суме набраных ачкоў беларуска здолела захаваць лідарства. Як толькі з'явіўся выніковы пратакол гонкі, Надзея адразу ж трапіла ў абдымкі трэнера жаночай зборнай Альфрэда Эдэра.
Для Надзеі Скардзіны гэта першы ў кар'еры Малы хрустальны глобус.
Тым часам у кветкавай цырымоніі ўшаноўвалі нашу Дар'ю Домрачаву - з двума промахамі Даша фінішавала шостай.
Мы гаворым Дар'я Домрачава і разумеем Оле Эйнар Б’ёрндален, які магчыма не трапіць у алімпійскую каманду Нарвегіі, ужо вельмі моцная канкурэнцыя ўнутры адной з лідзіруючых біятлонных зборных. Адзначым, для Б’ёрндалена гэтая была б сёмая алімпіяда ў яго кар'еры.
Але вернемся да жаночай індывідуальнай гонкі, якую сёння паспяхова правяла і яшчэ адна беларуска Ірына Крыўко, на першым агнявым рубяжы зарабіўшы адзін промах, на астатніх трох Іра адпрацавала на нуль.
У выніку Ірына Крыўко - 11-я, 35-я Дзінара Алімбекава, 73-я Дар'я Юркевіч. Заўтра ў Рупальдынгу адбудзецца мужчынская эстафета. Тэлеканал "Беларусь 2" будзе весці прамую трансляцыю, пачатак у 16:20.
