Мінск гатовы да I этапу Кубка свету па веласпорце на трэку

Шлях у Токіа стартуе ў Мінску. У барацьбе за ліцэнзіі на Алімпійскія гульні ў Японіі ў трэкавым веласпорце наступае  вырашальны момант.

З 31 кастрычніка па 3 лістапада веладром "Мінск-Арэны" прыме першы з шасці этапаў Кубка свету. Настолькі прадстаўнічага і зорнага складу ўдзельнікаў наша краіна яшчэ не прымала: 386 гоншчыкаў, 57 каманд з 44 краін рыхтуюцца ўступіць у барацьбу не толькі за медалі, але і за рэйтынгавыя ачкі, якія неабходныя, каб атрымаць квоту на галоўны старт чатырохгоддзя. Каманда Беларусі выступіць наймацнейшым складам. У яе ўвайшлі 17 спартсменаў, у тым ліку Яўген Каралёк, Таццяна Шаракова і Алёна Амялюсік. Дарэчы, спаборніцтвы разбітыя на чатыры, а не на тры звыклыя дні, каб атлетам было камфортна і як мага больш гоншчыкаў прынялі ўдзел у розных дысцыплінах.

Анастасія Войнава,  двухразовая пераможца II Еўрапейскіх гульняў, сярэбраны прызёр Алімпійскіх гульняў па веласпорце на трэку (Расія):  "Я, напэўна, за гэты сезон тут ужо чацвёрты або пяты раз. Мы прыязджаем сюды на трэніровачныя зборы. Трэка, а менавіта 250 м, які адпавядае сусветнаму стандарту, у нас дзяржаўнага няма. І таму такога ўзроўню міжнародных спаборніцтваў  у нас не праводзяць. А тут было праведзена ўжо столькі спаборніцтваў высокага ўзроўню: чэмпіянат свету, Кубак свету, Еўрапейскія гульні. Для мяне як для веласіпедысткі гэта свайго роду мара, што такое ж будзе адбывацца і ў маёй краіне".

У праграму спаборніцтваў увайшлі індывідуальны і камандны спрынт, камандная і індывідуальная гонка праследавання, кейрын, омніум, мэдысан і гонка па ачках. У чацвер пачнуцца кваліфікацыі. А цырымонія адкрыцця - у пятніцу ў 16:45. Арганізатары чакаюць высокую цікавасць з боку балельшчыкаў. Да іх паслуг, дарэчы, будзе нямала розных актыўнасцяў.