Майстэрства паказвалі танкавыя экіпажы з Беларусі, Расіі, Казахстана і Арменіі. Там упершыню прайшлі міжнародныя спаборніцтвы па танкавым біятлоне.
Расказвае Максім Кароткін.
Чырвоны, жоўты, блакітны - выбірай любы. Танкі на падмаскоўным палігоне Алабіна расфарбавалі ў 4 колеры для таго, каб суддзям і гледачам было зручна адрозніваць экіпажы падчас спаборніцтваў. Расфарбоўку выбіралі напярэдадні жараб'ёўкай. Беларусам дастаўся жоўты, Расіі - чырвоны, казахам і армянам - сіні і зялёны адпаведна. Біятлон для танкістаў - свайго роду навінка і асаблівы від трэніроўкі: дапамагае палепшыць узаемадзеянне экіпажа і адпрацаваць дзеянні ў складаным становішчы.
Прынцыпы танкавага біятлона ў цэлым падобныя да прынцыпаў біятлона звычайнага. Тут таксама 3 кругі па 3600 метраў у кожным, агнявыя рубежы. Хто прамахваецца, павінен праехаць штрафны круг.
Зрэшты, былі тут і свае складанасці: акрамя стральбы і кіравання на хуткасць, экіпажам трэба было пераадолець шэраг перашкод, пераправіцца праз водную перашкоду ўброд і ўсцерагчыся ад умоўнага міннага поля. Памылкі пры праходжанні дыстанцыі караюцца штрафнымі ачкамі - іх улічваюць пры падвядзенні вынікаў. З правіламі ўсё проста - з дыстанцыяй апынулася не настолькі. Ужо на першым практыкаванні пры загрузцы снарада траўміраваўся камандзір казахскага экіпажа. Яго замянілі камандзірам рэзервовай каманды, а за гэты час расіяне і беларусы пайшлі наперад, папаўшы ў цэль адзіным стрэлам.
Чырвоны танк расіянаў вырваўся наперад, затое беларусы былі дакладнейшыя на агнявых рубежах. З гарматы і кулямёта жоўтаму танку атрымалася закрыць усе мішэні, акрамя адной. У момант, калі здавалася, што наш экіпаж вось-вось зраўняецца з расіянамі, заклінавала гармату. Камандзір вырашыў выправіць сітуацыю на месцы, але незнаёмая машына - усе танкі падаваў расійскі бок - не паддалася. За гэты час беларусаў абышлі казахі, якія паспелі адкруціць штрафныя кругі.
Нягледзячы на трэцяе месца з 4, выступленне беларускага экіпажа ацанілі станоўча. Галоўным чынам за бездакорную стральбу. Танкісты атрымалі сур'ёзны вопыт, а практыкаванні з біятлона могуць быць уключаныя ў праграму падрыхтоўкі беларускіх ваенных.
Біятлон, падобна, становіцца трэндам баявой падрыхтоўкі танкавых часцей. Ён апынуўся яшчэ і даволі відовішчнай падзеяй, цікавай для гледачоў. Дарэчы, расіяне паабяцалі, што ў наступным годзе запросяць значна больш каманд. Не выключана, што ў біятлоне - 2014 возьмуць удзел танкісты з ЗША і Заходняй Еўропы.
