Матчавую сустрэчу па лёгкай атлетыцы Еўропа - ЗША Мінск прыме ў панядзелак

Еўропа і ЗША высветляць, хто хутчэйшы, вышэйшы, мацнейшы. І гэта сапраўды будзе відовішчна. Матч пройдзе на сталічным стадыёне "Дынама", а беларусы стануць часткай еўрапейскай каманды. 

Каманды ўжо прыбылі ў Беларусь, трэніруюцца і прывыкаюць да свайго сектара на арэне. У нашай краіне ўжо і галоўны трафей спаборніцтваў. Пра галоўных фаварытаў найбліжэйшых дзён  рэпартаж нашага спартыўнага аглядальніка Паўла Капуцкага.

Зроблены з серабра, па выніках матча на ім выгравіруюць назву каманды-пераможніцы. Кубак вышынёй 55 сантыметраў прэзентавалі сёння вечарам.

Субота, другая палова дня. Разміначнае поле стадыёна "Дынама". Спартсмены трэніруюцца. Праўда, толькі амерыканцы. Каманды Еўропы  няма.

Ванеса Фрэйзер выступіць на "Дынама" ў панядзелак. Яе дысцыпліна -  бег на 3  тысячы метраў. Год  таму дзяўчына скончыла адзін з самых прэстыжных у свеце - Стэндфардскі ўніверсітэт. Да паездкі ў Беларусь Фрэйзер рыхтавалася.

Вучылася Ванеса ў Каліфорніі, адтуль родам і шасціразовая алімпійская чэмпіёнка бягуха Элісан Фелікс. А яшчэ ў Мінск прыехала двухразовая чэмпіёнка свету ў скачках у вышыню Марыя Ласіцкенэ, пераемнік Усейна Болта ў мужчынскім спрынце Раміль Гуліеў, двухразовая алімпійская чэмпіёнка ў кіданні дыска Сандра Перкавіч і іншыя сусветныя суперзоркі лёгкай атлетыкі.

Матчавая сустрэча Еўропа - ЗША пройдзе ўпершыню. Але з 1958 года ў  падобным фармаце зборная СССР спаборнічала з амерыканцамі. За 19 гадоў зорна-паласатыя перамаглі толькі тройчы. Адзін раз (у 1973 годзе) каманды спаборнічалі ў Мінску. Гаспадары выйгралі.

Пачатак спаборніцтваў у панядзелак а 19-й  гадзіне, але спачатку цырымонія адкрыцця. 

Заўтра на гэтых трыбунах будуць балельшчыкі са Злучаных Штатаў Амерыкі, Канады, Германіі, Італіі, Швецыі і нават Пакістана. Усяго больш  чым з двух дзясяткаў краін. Але асноўныя гледачы - беларусы. І нават добра, што лёгкаатлетычны матч пройдзе ў панядзелак і аўторак. Пакуль цёпла, многія праводзяць выхадныя за горадам. 

Вядома, убачыць лепшых спартсменаў свету можна і па тэлевізары. Падчас трансляцыі на стадыёне "Дынама" задзейнічаюць паўсотні камер. На спаборніцтвах па лёгкай атлетыцы ў рамках Еўрапейскіх іх было ў два з паловай раза менш.

Матч пакажуць нават у Мексіцы і Новай Зеландыі, хаця спартсмены з гэтых краін у Мінску не выступяць. Экзамен для тэлевізіёншчыкаў і залік для спартсменаў, якія рыхтуюцца да галоўнага старту года - чэмпіянату свету ў Досе. Ён пачнецца 27 верасня. 

Прызавы фонд - больш  за 800 тысяч еўра. Грошы супастаўныя з тымі, што спартсмены зарабляюць на этапах Брыльянтавай лігі. Перамога ў індывідуальных дысцыплінах ацэньваецца ў 7 тысяч еўра. Лепшы склад эстафеты атрымае на адну тысячу менш. 

Пакуль удзельнікі не думаюць аб папаўненні рахунку. Даюць інтэрв'ю і фатаграфуюцца. У кожным відзе праграмы выступяць 8 атлетаў (па чатыры  ад каманды). У складзе зборнай Еўропы 14 беларусаў.