Матчавая сустрэча Еўропа - ЗША. Засталося пяць дзён

Да унікальнай падзеі ў лёгкай атлетыцы - матчавай сустрэчы "Еўропа - ЗША" - засталося 5 дзён. І сёння ў беларускую федэрацыю гэтага віду спорту  прыйшлі радасныя навіны. У склад каманды старога кантынента  ўвайшлі яшчэ 3 нашыя атлеты. 9 і 10 верасня  на стадыёне "Дынама" на дыстанцыі 800 метраў выступіць Юлія Кароль. Тры  кіламетры пабяжыць Кацярына Карняенка. А на 110 метраў з бар'ерамі  заяўлены Віталь Парахонька. Аб гатоўнасці  да форуму і каго чакаць у Мінску - ужо зараз. 

Расказвае  Крысціна Камыш.

Максім Недасекаў  у гэтыя дні не сыходзіць са стадыёна па вуліцы Каліноўскага, 111. Атлет прапускаў чэмпіянат краіны ў мінулыя выхадныя дзеля этапу Брыльянтавай лігі ў Цюрыху і міжнароднага турніру ў Берліне.

У Швейцарыі вынік быў 2 метры  24 сантыметры. Спартсмен прадставіць Еўропу на матчавай сустрэчы супраць ЗША. Усяго 14 беларусаў у складзе каманды старога кантынента.

Максім Недасекаў стаў героем стыкерпака для аднаго месенджара, распрацаванага спецыяльна да матчавай сустрэчы. Там жа Халадовіч, Герман, Ціхан. Запампаваць набор "Утульная кухня БФЛА" можна бясплатна. 

Усяго 37 дысцыплін і 304 атлеты. У кожным відзе праграмы на матчавай сустрэчы Еўропа - ЗША выступяць па восем  спартсменаў. 

Ужо сама прысутнасць сярод удзельнікаў Раміля Гуліева робіць афішу забегаў на 200 метраў па-сапраўднаму  зорнай. Чэмпіён свету з Турцыі, які змяніў на гэтым троне самога Усейна Болта! У Мінску пасол матча абяцае размяняць 20-секундны рубеж. І стадыён "Дынама" яму ў гэтым дапаможа.

Тое, што Гуліева падтрымае чэмпіён свету брытанец Рычард Кілці, не выводзіць каманду Еўропы ў фаварыты дысцыпліны. У складзе ў амерыканцаў у асноўным маладыя хлопцы. Але вынікі сезона Родні Роу, Джаміля Трымбла і Кайры Кінга намякаюць, што на мінскіх дарожках мала не здасца нікому.

Вадзім Дзевятоўскі, старшыня Беларускай федэрацыі лёгкай атлетыкі: "Будзе барацьба. Нельга адгадаць. Асабліва ў спрынтараў. Там ЗША ўсіх парве".

Да ўнікальнай падзеі застаецца толькі 5 дзён. Спаборніцтвы ўбачыць увесь свет. 
Правы на трансляцыю матча Еўропа - ЗША набылі, напрыклад, брытанская кампанія BBC, амерыканская NBC. Пакажуць лёгкую атлетыку 3 ПТС Белтэлерадыёкампаніі, звыш 50-ці камер. 5 рэжысёрскіх брыгад будуць адказваць за малюначак. 

Аляксандр Бут-Гусаім, генеральны каардынатар лёгкаатлетычнага матча Еўропа - ЗША: "Вядома ж, Злучаныя Штаты, Польшча, Літва. Вось толькі што я атрымаў пацверджанне, што шведы таксама выкупілі. Пасля таго як аб’явіўся  спіс еўрапейскіх спартсменаў, тэлеканалы вельмі хутка пачынаюць пацвярджаць свой намер трансляваць матч. Цырымонія адкрыцця будзе ў рамках спаборніцтваў. Гэта будзе 20 - 25 хвілін, але ўпэўніваю вас, што гэта будзе ў нацыянальным стылі. Мы не можам пакуль прыадкрыць  гэты сакрэт. Але мы хочам паставіць своеасаблівы рэкорд".

Лёгкаатлетычную сустрэчу Еўропа -  ЗША замежныя грамадзяне ў адпаведнасці з указам Прэзідэнта могуць наведаць па бязвізе

Для ўезду ў нашу краіну турыстам неабходна мець пры сабе пашпарт, а таксама арыгінальны або электронны білет на спаборніцтвы.

Сяргей Кавальчук, Міністр спорту і турызму Беларусі: "На жаль, гэта маленькае мерапрыемства. Яно ўключае ў сябе ўсяго толькі два дні. Але мы спадзяёмся, што за гэтыя два дні турысты з Еўропы прыедуць. Я ведаю, што сапраўды купілі сюды білеты турысты з ЗША, якія гатовыя прыехаць і паглядзець гэтую матчавую сустрэчу. Гэта будзе цікава ўсім. Склад Злучаных Штатаў Амерыкі самы зорны. Сапраўды таксама як і склад Еўропы. Тут будуць усе лепшыя прадстаўнікі лёгкай атлетыкі, якіх сёння можна ўбачыць у свеце".

Трапіць на стадыён "Дынама" ў панядзелак-аўторак можна будзе па білетах коштам ад 12 да 25 рублёў. Пры куплі квітка на два дні спаборніцтваў дзейнічаюць акцыі. А яшчэ ёсць скідкі для дзяцей і спецыяльныя прапановы для сем'яў.