Менш за суткі да вырашэння спартыўнай інтрыгі 21 года. Каму будзе аддадзена права правядзення чэмпіянату свету па хакеі? Прэтэндэнтаў, нагадаем, двое: беларуска-латвійскі тандэм і Фінляндыя. Улічваючы папярэдні паспяховы вопыт арганізацыі сусветнага першынства, у нашай сумеснай заяўкі шанцы вельмі нядрэнныя, але не будзем пакуль загадваць. Бо і Фінляндыя некалькі разоў прымала маштабны форум. Сёння ж кандыдаты прадставілі свае заяўкі ў Кёльне, а заўтра ў 13:30 па мінскім часе за зачыненымі дзвярамі пачнуцца выбары. Напярэдадні лёсавызначальнага галасавання наш карэспандэнт Станіслаў Ліпскі ўзяў інтэрв'ю ў Прэзідэнта міжнароднай федэрацыі хакея Рэнэ Фазеля і даведаўся, хто, на яго думку, фаварыт у гэтай гонцы. Падрабязнасці прама зараз.
Убачыўшы мікрафон з лагатыпам "Беларусь 1", Рэнэ Фазель адразу ж дае згоду на інтэрв'ю. Пакінуўшы ВІП-ложу, выходзіць да нас у калідор і па-руску гаворыць: "Добры дзень". Абмяняўшыся прывітаннямі, цікавімся: "Хто, на Вашу думку, фаварыт у барацьбе за ЧМ?"
Рэнэ Фазель, прэзідэнт Міжнароднай федэрацыі хакея: "Дзве заяўкі вельмі моцныя. Мяне, як прэзідэнта IIHF, яны задаволілі абедзве, але ўсё ж падкрэслю, што ўспаміны ад мінскага чэмпіянату свету ў дэлегатаў кангрэса IIHF больш свежыя, таму лічу, усё ж у Вас крыху больш шанцаў (60 на 40). Калі б вылецелі з эліты сусветнага хакея, гэтыя суадносіны сталі б на карысць Фінляндыі. Ведаю тых, для каго гэта важны момант, але не буду называць прозвішчы. Аднак усё вырашыцца ў пятніцу".
19 студзеня гэтага года. Мінск і Рыга на вялікі прэс-канферэнцыі аб’явілі, што разам будуць змагацца за права правесці чэмпіянат у 2021. Латвійскі бок выступіў з ініцыятывай тут аб'яднаць намаганні, беларускі бок згадзіўся, падкрэсліўшы, што паўфіналы і фінал пройдуць на "Мінск-Арэне".
А вось падтрымаць беларуска-латвійскі хакейны саюз сёння можа кожны. Для гэтага дастаткова сфатаграфавацца ў якім-небудзь прыдатным антуражы і пад здымкам паставіць афіцыйны хештэг заяўкі #MINSKRIGA2021, што мы зараз і зрабілі.
Для тройчы лепшага пішучага журналіста, што асвятляў хакей, - расійскага спартыўнага аглядальніка Уладзіміра Мазгавога - ЧС у Парыжы і Кёльне 16-ы ў кар'еры, аднак самым яркім застаўся ў памяці турнір у Мінску, але зусім не з-за трыумфу расіян.
Уладзімір Мазгавой, спартыўны аглядальнік "Новой газеты", Расія: "Сам чэмпіянат быў арганізаваны бліскуча, на мой погляд. Я маю на ўвазе цікавасць гледачоў у першую чаргу, а не поспехі той або іншай каманды, гаспадароў. Таму я жадаю поспехаў беларускай заяўцы, якая 19 мая будзе вызначацца на кангрэсе".
Уладзімір Дзянісаў, абаронца зборнай Беларусі па хакеі: "З улікам вопыту 2014 года за ўсе чэмпіянаты свету, на якіх я быў, варта прызнаць, што ў Мінску было лепш за ўсё, як у Мінску - не было нідзе. І плюс я ведаю шмат людзей з розных краін, якія былі там, напрыклад, швейцарцы, германцы, паўночнаамерыканцы. Усе былі ў захапленні".
Нешта падобнае напэўна сёння адчулі члены кангрэса IIHF у Кёльне - беларуска-латвійская дэлегацыя правяла фінальную версію прэзентацыі сумеснай заяўкі.
Беларусь самастойна прымала ЧС у 2014, Латвія ў 2006, Фінляндыя ў 2003. Аднак у 2012 і 2013 два гады запар Хельсінкі прымалі турнір у сябе сумесна са Стакгольмам. Г.з. у 21 стагоддзі жыхары Суомі тройчы бачылі ў сябе на радзіме лепшых хакеістаў планеты. І мы, і латышы ўсяго па адным разе.
Люк Тардыф, прэзідэнт Федэрацыі хакея Францыі: "Я добра знаёмы са старшынёй Вашай федэрацыі, знаёмы з прадстаўнікамі латвійскага хакея, але, зразумела, не скажу, за каго я буду галасаваць. Мне трэба больш уважліва вывучыць праекты. У Фінляндыі, ведаю, ён таксама моцны, галасаванне будзе складаным, шанцы ацаніў бы 50 на 50".
У 2009 Беларусь заваявала права правесці ЧС у сябе 75 галасамі за, 29 супраць, заўтра, мяркуючы па ацэнцы спецыялістаў, такой перавагі ні ў адной з заявак не будзе. Выбары ў Кёльне стартуюць у 13:30 па мінскім часе.
