Галоўная традыцыя першых дзён новага года - спартыўнае свята для фанатаў хакея. І падарункам для балельшчыкаў стаў юбілейны трыумф. Каманда Прэзідэнта Беларусі напярэдадні вечарам дзясяты раз перамагла ў Калядным турніры. Спаборніцтвы сёлета атрымаліся сапраўды асаблівымі, а фінал - відовішчным і багатым на закінутыя шайбы.
Расказвае Павел Капуцкі.
Фіны ўжо становяцца прынцыповым сапернікам для беларусаў. Суомі не першы раз прывозяць у Мінск моцны састаў і ў 2016 таксама гулялі ў фінале. Тады ўсё вырашыла адна шайба, закінутая ў трэцім перыядзе, 2:1.
Зараз фіны здолелі закінуць тройчы, але інтрыга пражыла менш, чым год таму, таму што справы ў атацы ў гаспадароў ладзіліся, 7:3 выніковы лік.
У адной з галявых камбінацый паўдзельнічаў і Аляксандр Лукашэнка, на рахунку якога ў матчы з фінамі дзейсная перадача. Найлепшым жа бамбардзірам Каляднага турніру стаў фін Тоні Макіяха.
Тоні Макіяха, найлепшы бамбардзір XIII Каляднага турніру, Фінляндыя:
"Тое, што я найлепшы бамбардзір, не галоўнае. Усё-такі хакей - камандная гульня. Апошні раз пры такой публіцы гуляў гадоў шэсць таму, калі выступаў за швейцарскі Берн. Ведаеце, выдатна, што раз у год мы з сябрамі можам сабрацца, пайграць у хакей і адчуць сябе маладзейшымі".
Упершыню ў гісторыі бронзавыя медалі Каляднага турніру выйграла каманда Аб'яднаных Арабскіх Эміратаў. Дэбютавалі сёлета Балканы. Не павялічваючы колькасць удзельнікаў, атрымалася пашырыць геаграфію, бо ў складзе паўднёўцаў прадстаўнікі адразу васьмі краін.
У наступным студзені гаспадары пастараюцца абараніць тытул, але зрабіць гэта будзе няпроста. Захапляючыся ўзроўнем арганізацыі, госці ўсё-такі мараць аднойчы падняць кубак над галавой. І ў іх ёсць роўна год, каб падрыхтавацца.