Удача і надзея з заміраннем сэрца. Менавіта так можна ахарактарызаваць завяршэнне чацвёртага спаборніцкага дня ў Рыа. Позна вечарам беларускія баскетбалісткі ў матчы супраць бразільянак змаглі закруціць інтрыгу. Нягледзячы на неверагодную падтрымку трыбун гаспадынь турніру, нашы ўсё ж здолелі выcтаяць і перамагчы. Алімпійская фартуна працягвае трымаць шэфства і над нашым гульцом у настольным тэнісе Уладзімірам Самсонавым. Ён змог перасягнуць самога сябе. У выніку Уладзімір у паўфінале. Мы верым у нашых спартсменаў і шчыра жадаем ім перамог.
Уся храналогія алімпійскага дня, а таксама надзвычайнае здарэнне ў Рыа ў сюжэце Мікалая Стулы.
Ва ўчарашнюю гульню супраць гаспадынь турніру беларускі ўключыліся толькі, калі было мінус 18 ачкоў. Трыбуны равуць так, што закладвае вушы, працэнт трапляння і працэнт браку нашых набліжаліся да антырэкорду. Няўжо гэта ўсё? Трэцяе паражэнне запар выглядала прысудам усім алімпійскім перспектывам.
Не, не ўсё. Пры ўсёй разнастайнасці валідольных перамог у Беларусі будзе і яшчэ адна, бразільская. У камандных відах спорту не прынята выдзяляць кагосьці персанальна, але тут асаблівы выпадак. Гэтую гульню выцягнула перш за ўсё Таццяна Троіна. Яна завяла нашу каманду сваімі трохачковымі кідкамі. Скарачаць адрыў трэба было хутка, і лепш за ўсё гэта рабіць з-за дугі. Пяць з сямі спроб Тані дакладныя. Усяго 18 ачкоў пры 26 хвілінах на пляцоўцы - лепшы адказ тым, хто раіць Анатолю Буяльскаму хутчэй праводзіць змену пакаленняў.
Перамога над Бразіліяй была дасягнутая пры ашаламляльным шумавым супраціўленні трыбун, Бразіліі падсвіствалі суддзі. І хаця ў рэйтынгу беларускі каціруюцца вышэй за саперніка, але выйграць не ўдалося з запасам. Зноў валідольная перамога - нашы заўсёды адрозніваліся здольнасцю трымаць інтрыгу.
Гавораць, калі жыць пастаянна ў стане стрэсу, да яго прывыкаеш і ніякіх эмоцый не адчуваеш. Увесь сівы Анатоль Буяльскі адмаўляецца называць сваю працу шкоднай.
Яшчэ ўчора з двума абаранкамі ў кішэні беларускі марылі прабіцца ў плэй-оф з чацвёртага месца, а там годна саступіць ЗША - безумоўнаму фаварыту турніру. Зараз ёсць шанц размінуцца са Штатамі. У заўтрашняй гульні з Турцыяй трэба перамагаць. Але на гэты раз з разрывам у 10 ачкоў і больш.
Так атрымалася, што стан стрэсу ў беларускіх журналістаў пасля баскетбола падтрымалі падзеі позняга вечара. Карэспандэнт газеты "Прессбол" Артур Жоль вяртаўся ў медыяцэнтр на аўтобусе, як у раёне фавел пачуў два воплескі, зазвінела шкло...
Калі ў вас няма другога тэлевізара, то да чацвярга купіце або вазьміце напракат, таму што баскетбалісткам і Уладзіміру Самсонаву прыйдзецца гуляць паралельна, а ўсёй Беларусі раздвойваць увагу. Вялікі майстар і вялікі няўдачнік Алімпіяд ідзе да сваёй самай запаветнай мэты - ён ужо ў паўфінале Гульняў у Рыа! Напярэдадні пераможаны сябар, таварыш і аднаклубнік - Дзмітрый Аўчароў з Германіі.
Гэта была гульня, і па напале яна магла даць фору нават баскетбольным закруткам. Па-першае, Самсонаў не быў у матчы фаварытам, па-другое, атрымаў траўму і ўзяў медыцынскі тайм-аўт. Ці шмат вы паставіце на спартсмена пры такіх зыходных даных? У Валодзю верылі не толькі беларусы, але і катарскі журналіст Амр Фахмі.
У паўфінале Самсонаў падыдзе да кітайскай сцяны. Ён высокі хлопец і калісьці ў адзіночку беларус супрацьстаяў усёй Паднябеснай, кожнаму школьніку ў якой выкладаюць урокі настольнага тэніса. Настаў час успомніць мінулае - паважанаму чалавеку пара пазбаўляцца ад ярлыка "алімпійскі няўдачнік". Ужо зараз Самсонаў перасягнуў сябе на Гульнях. І, здаецца, у яго выраслі крылы.
