Калі прытрымлівацца прынцыпу, што ўсё вялікае пачынаецца з малога, то шлях у вялікі хакей пачынаецца не дзе-небудзь, а ў Бярозе. У невялікім мястэчку Брэсцкай вобласці вось ужо 8 гадоў паспяхова рыхтуюць маленькіх спартсменаў. І пяць гадоў хакейная школа знаходзіцца пад патранажам вядучага клуба краіны "Дынама-Мінск". "Зубры" пайшлі ў водпуск два тыдні таму, усе легіянеры адправіліся дахаты, а вось галоўны трэнер бела-сініх Гордзі Дуаер застаўся ў Беларусі. І для выхаванцаў Бярозаўскай школы настаўнік правёў майстар-клас. Пра ўзаемныя ўражанні Крысціна Камыш.
Горад Бяроза ў Брэсцкай вобласці - трыццацітысячнік. Ужо 59 гадоў у населеным пункце працуе СДЮШАР. Тут рыхтуюць будучых чэмпіёнаў па лёгкай і цяжкай атлетыцы, тэнісе, плаванні, футболе, а таксама хакеі.
Развіццё гэтаму віду спорту ў горадзе дало будаўніцтва арэны. Лядовы палац функцыянуе з 2009 года. Агульная плошча будынка - больш за 5 000 метраў квадратных. Змяшчальнасць на трыбунах - 572 гледачы. Але, вядома ж, тут галоўнае - лядовая пляцоўка еўрапейскага стандарту.
Алег Пукала вучыцца ў трэцім класе. Хлопчык - выдатнік. Удзельнічае ў алімпіядах па матэматыцы і мовах. Але не навуковым шляхам дзіця збіраецца пайсці ў будучыні.
Такіх хлапчукоў у Бярозе 125. У школе рыхтуюць 5 узроставых груп: ад 7 да 15 гадоў. Хакеісты выступаюць у рэспубліканскіх спаборніцтвах, прычым тры каманды - у наймацнейшай групе А. Навучаюць маленькіх спартсменаў 4 трэнеры. Хакейная школа існуе ўсяго 8 гадоў, але ўжо ёсць вынікі.
Аляксандр Палта, дырэктар СДЮШАР г. Бярозы: "Поспехі ёсць розныя, іх можна назваць лакальныя і глабальныя. Шмат, насамрэч. Значыць, за гэты час адзін узрост нашых хлопцаў - самых старэйшых - ужо паспеў пакінуць школу і папоўніў шэрагі іншых клубаў, іншых школ. Зразумелая справа, што найбліжэйшы хакейны клуб "Брэст" нашых прымаў. Сёння нашы хлопцы ёсць у школе "Дынама" ў самых старэйшых узростах. У салігорскім "Шахцёры" нашы выхаванцы ёсць".
Галоўная праблема школы - недахоп дзяцей. Навучанне бясплатнае, амуніцыю даюць. Дапамагае школе ўжо 5 гадоў галоўны хакейны клуб краіны "Дынама-Мінск". Прычым не толькі матэрыяльна, але і фізічна. Па добрай традыцыі ў канцы сезона "зубры" праводзяць майстар-класы. Гэтым разам у Бярозу прыехаў галоўны трэнер Гордзі Дуаер. Дзеля гэтай сустрэчы канадзец затрымаўся ў Беларусі на два тыдні.
Да сустрэчы з трэнерам бела-сініх дзеці рыхтаваліся загадзя. Хлопцы ўзмоцнена вывучалі англійскую мову, каб задаць канадцу пытанне, як развівацца. І на трэніроўку маладое пакаленне хакеістаў выйшла на 20 хвілін раней.
Асноўны ўпор падчас свайго майстар-класа Гордзі Дуаер рабіў на катанні і іншых элементах хакейнага майстэрства.
Гордзі Дуаер, галоўны трэнер ХК "Дынама-Мінск": "Гэта была добрая магчымасць для дзяцей правесці час з трэнерскім штабам "Дынама". Сёння я сказаў хлопцам, што яны шчасліўчыкі. Маладыя хакеісты ў Беларусі займаюцца па 2 гадзіны на лёдзе 5 дзён запар. Для параўнання, тры маіх сыны дома на катку працуюць максімум 4 гадзіны на тыдзень. У вас хлопчыкі катаюцца пад наглядам спецыялістаў. У Канадзе такога няма. Прафесійныя трэнеры з дзецьмі не працуюць - толькі валанцёры або бацькі. Тут побач ёсць спарткомплекс з басейнам, трэнажорнымі заламі, футбольным полем. Дзівосныя ўмовы, каб прагрэсаваць. Зараз усё залежыць ад гульцоў. Яны павінны максімальна выкарыстаць гэтыя магчымасці".
У краіне зараз 29 хакейных школ. Будучыня расце.
Як прыклад, на наступны чэмпіянат свету ў складзе зборнай Беларусі да 18 гадоў маюць шанец паехаць тры выхаванцы Бярозаўскай школы: нападаючы Яўген Аксянцюк, абаронца Дзмітрый Казарэз і варатар Аляксей Галенка.
Юніёрскі чэмпіянат свету пройдзе ў Магнітагорску і Чалябінску з 19 па 29 красавіка. Зборная Беларусі выступіць у квінтэце А. На групавой стадыі наша каманда згуляе з ЗША, Швецыяй, Канадай і Швейцарыяй.