Амаль тры сотні юных футбалістаў з 24 краін. У міжнародным сацыяльным праекце Газпрама "Футбол для сяброўства" Беларусь прыняла ўдзел другі раз. Напярэдадні з Германіі вярнулася юнацкая каманда БАТЭ. Хлопцы выйшлі на поле ў турніры па міні-футболе. Галоўным жа падарункам для футбалістаў стала магчымасць убачыць сваіх куміраў - гульцоў "Барселоны" і "Ювентуса", наведаўшы фінальны матч Лігі чэмпіёнаў УЕФА на алімпійскім стадыёне ў нямецкай сталіцы. Уражанні юных гульцоў - у рэпартажы Наталлі Тарасюк.
Амаль тры сотні ўдзельнікаў Трэцяга міжнароднага сацыяльнага праекта "Футбол для сяброўства" размясціліся на трыбунах міні-футбольнага поля проста ля Брандэнбургскіх варот, дзе разгарнулася галоўная фан-зона фіналу Лігі чэмпіёнаў. Гэта юныя футбалісты з 24 краін свету, а сёлета праект ступіў і за межы Еўропы: упершыню да форуму далучыліся Казахстан, Кітай і Японія.
Сёлета правілы правядзення міжнароднага турніру па футболе трохі змяніліся. Ён праходзіў два дні. У першы ўсе 24 каманды ў выніку жараб'ёўкі падзялілі на тройкі. Юнацкая каманда БАТЭ правяла два матчы: саступіла харватам, але атрымала перамогу над французамі. Кожная гульня працягвалася па 16 хвілін. На поле выходзілі па 7 гульцоў з кожнага боку. У выніку вызначылі двух фіналістаў - імі апынуліся Аўстрыя і Швейцарыя.
Пляцоўка перад галоўным сімвалам Берліна і стала месцам фінальнай бітвы юнацкага турніру. Перамога дасталася аўстрыйскай камандзе.
Пасля фінальнага паядынку - цырымонія ўзнагароджання. Затым на поле выносяць Кубак дзевяці каштоўнасцяў праекта Газпрама. Ён дастаўся Барселоне за дабрачынныя і сацыяльныя праграмы па выніках галасавання юных удзельнікаў праекта. А вось у перапынках паміж матчамі юныя футбалісты маглі ўзяць аўтограф у гульцоў "Зеніта" і сфатаграфавацца з паслом праекта "Футбол для сяброўства" Францам Бекенбаўэрам.
Франц Бекенбаўэр, глабальны пасол праекта Газпрама "Футбол для сяброўства":
"Гэта вялікае рашэнне - увасобіць у жыццё праект "Футбол для сяброўства". Гэта выдатная ініцыятыва, і я з гонарам падтрымліваю і заўсёды гатовы прымаць удзел у такіх праграмах. Дзеці могуць знайсці ўзор для пераймання, а для дарослых гэта стымул працягваць сацыяльную дзейнасць".
Але, мабыць, больш за ўсё каманда БАТЭ чакала фінал Лігі чэмпіёнаў. Білеты на матч - падарунак арганізатараў праекта.
За бітвай "Барселоны" і "Ювентуса" ўдзельнікі праекта сачылі на трыбунах алімпійскага стадыёна. І, магчыма, хтосьці з каманды ў будучыні выйдзе на поле ў фінале самага прэстыжнага еўрапейскага турніру ў якасці гульца.
У наступным годзе "Футбол для сяброўства" прыме Мілан. Там жа вызначыцца і новы ўладальнік трафея Лігі чэмпіёнаў УЕФА. А магчымасць убачыць самы яркі матч 2016 ізноў будзе і ў юных футбалістаў з нашай краіны.
