Дзе жывуць і як адпачываюць юныя біятланісты

20 Лютага 2015

Сталічныя гасцініцы да чэмпіянату свету склалі асаблівае меню і здзіўляюць гасцей з розных краін. Кітай, Швецыя, Новая Зеландыя, Аўстралія - геаграфія балельшчыкаў, дарэчы, не саступае геаграфіі ўдзельнікаў. І тым не менш традыцыйныя беларускія дранікі, бліны і сырнікі спадабаліся ўсім. За выступленнем спартсменаў і эмоцыямі балельшчыкаў сачыла і мая калега Таццяна Нікіціна.

Сем гадзін раніцы, а балельшчыкі ўжо на нагах і гатовыя на сняданак пакаштаваць беларускія стравы. Работнікі кафэ ахвотна частуюць замежных гасцей блінамі, дранікамі і сырнікамі.

А спартсмены-біятланісты больш налягаюць на мясныя стравы. Ім спадабалася свініна, бараніна і ялавічына.

Напярэдадні ў гэтым сталічным гатэлі размясціліся 130 гасцей з розных краін. Майкл і Лія з Новай Зеландыі ўпершыню ў Беларусі.

Дзе правесці вольны час? Што паглядзець? Якія сувеніры купіць? У вырашэнні гэтых пытанняў спартсменам і балельшчыкам дапамагаюць валанцёры. Часцей за ўсё - студэнты-лінгвісты.

Пасля складанай гонкі перавесці дух можна ва ўтульных нумарах. Тут створаны ўсе ўмовы для камфортнага адпачынку.

Класціся спаць крыху раней тут не спяшаюцца. Шумная інтэрнацыянальная кампанія знаходзіць час і на забавы.

Свята не толькі ў Раўбічах, але і на вуліцах Мінска. Яркія касцюмы, флагі і, вядома, добры настрой.

Аўстралія, Новая Зеландыя, Швецыя, Кітай. Геаграфія балельшчыкаў адпавядае геаграфіі ўдзельнікаў чэмпіянату свету па біятлоне сярод юніёраў у Раўбічах. Пасля спаборніцтваў яны не спяшаюцца ў свае гасцінічныя нумары. Гуляюць па горадзе, спрабуюць нацыянальныя стравы ў рэстаранах і, вядома, купляюць сувеніры.

А да мінчаніна Аляксея ў госці прыехала вялікая кампанія. Вось і гонку паглядзелі, а зараз можна і Мінск лепш разгледзець.

Ужо заўтра раніцай усе ахвотнікі могуць зноў адправіцца па вострыя адчуванні. Падвозяць балельшчыкаў да спартыўнага комплексу экспрэсныя аўтобусы. 449Б адпраўляецца ў 8 раніцы ад станцыі метро "Барысаўскі тракт". Інтэрвал руху - 15 хвілін.