Ала Цупер панясе сцяг нашай зборнай на цырымоніі адкрыцця XXIII Гульняў
Лічаныя дні, калі не сказаць гадзіны, аддзяляюць свет ад галоўнага спартыўнага старту чатырохгоддзя. Паўднёвакарэйскі Пхёнчхан працягвае сустракаць спартсменаў, трэнераў і журналістаў з розных куткоў планеты. Сёння прыбыла прадстаўнічая дэлегацыя Белтэлерадыёкампаніі. Нашы карэспандэнты, што называецца, прама з колаў уключаюцца ў асвятленне перадалімпійскага жыцця. Цэнтральнай падзеяй дня стала ўзняцце беларускага флага ў алімпійскай вёсцы. У цырымоніі прынялі ўдзел мэр вёскі Сеун Мін Ру, шэф місіі Аляксандр Баравуля, пасол Беларусі ў Паўднёвай Карэі Андрэй Папкоў, нашы спартсмены і трэнеры. Узняцце флага - адна з найстарэйшых традыцый Гульняў. Яна азначае, што спартсмены гатовыя змагацца за медалі. І сёння ж стала вядома, што сцяг нашай зборнай на цырымоніі адкрыцця XXIII Гульняў панясе алімпійская чэмпіёнка фрыстайлістка Ала Цупер. За падзеямі ў Пхёнчхане сочыць наш карэспандэнт Мікалай Стула.
На ўрачыстую цырымонію ўзняцця дзяржаўнага флага Сяргей Далідовіч прыйшоў раней за ўсіх. Акрамя беларусаў, тут, на Olympic village plaza, збіраліся яшчэ каманды Аргенціны, Манголіі, Балівіі.
Алімпійцы ішлі ў вобразах, якія ім падрыхтавалі арганізатары.
Трохразовая алімпійская чэмпіёнка Дар'я Домрачава тут самая заслужаная спартсменка і галоўная беларуская надзея. Гаворыць, што расклад спаборніцтваў не пакідае выбару - на цырымонію адкрыцця біятланісткі зноў не пойдуць.
Каманды-ўдзельнікі выходзяць на цэнтр плошчы. Уступнае слова арганізатараў пра дух сумленнай барацьбы, і на сцэну запрашаецца шэф беларускай місіі Аляксандр Баравуля.
Пад гукі гімна паднімаецца нацыянальны флаг. Пасля гэтай нядоўгай пратакольнай цырымоніі цікавімся ў пасла Беларусі ў Рэспубліцы Карэя, ці ўсё зроблена для каманды?
Краіна, якая прымае Алімпіяду, лічыцца яе гаспадыняй, але не сакрэт, што ўсімі арганізацыйнымі працэсамі кіруюць людзі прыезджыя. Напрыклад, падрыхтоўка аб'ектаў да спаборніцтваў - прэрагатыва спецыяльна навучаных людзей, якія маюць багаты вопыт.
Рэмі Боку ў Паўднёвай Карэі адказвае за падрыхтоўку лёду. Гэта толькі здаецца, што праехала залівальная машына і паверхня гатовая. Насамрэч цэлае мастацтва.
А вось так праходзіць падрыхтоўка лёду на хакейных пляцоўках у Пхёнчхане. Балельшчык гэта не бачыць. Работы выконваюць не толькі іншаземцы, яны яшчэ і перадаюць вопыт мясцовым.
Пакуль алімпійскія спаборніцтвы яшчэ не захапілі балельшчыка, ёсць магчымасць ацаніць карэйскі каларыт. Сустрэць світанак на беразе Японскага мора пры моцным ветры і марозе - гэта незабыўна.
Мясцовыя жыхары ў чаканні спаборніцтваў размалёўваюць сваё жыллё ў колеры Алімпіяды. Вось тут талісманы Гульняў, а таксама персанажы, якія талісманамі так і не сталі. Прайгралі канкурэнцыю.
А вось у чырвона-зялёным касцюме на сцяне намалявалі гарналыжніка. Няўжо змалявалі з фота беларуса Юрыя Данілачкіна?
У нашых шыротах так заведзена, што зімовая рыбалка - гэта доля суровых мужчын. У Карэі ж, хутчэй, сямейная забава. Вакол не абсалютная цішыня, тут разгортваюцца сапраўдныя гулянні. Любое дзіця з рознай ступенню ўседлівасці можа злавіць рыбку. Мабыць, ловіцца тут добра, ведаюць, як прынадзіць.
Паўднёвая Карэя гатовая да прыёму гасцей. Мясцовыя рынкі заваленыя спецыямі, усім тым, што будзе цікава прыезджаму чалавеку. Гандляры спадзяюцца на добры прыбытак, хоць і ўсвядамляюць - цэны ў гэтай краіне даволі высокія.
