Калядны турнір па хакеі сярод аматараў на прыз Прэзідэнта Беларусі даўно выйшаў за рамкі проста спартыўнага спаборніцтва: дабрачынныя акцыі, круглы стол з абмеркаваннем стратэгіі развіцця хакея з шайбай, перамовы аб супрацоўніцтве і, вядома ж, майстар-клас для юных спартсменаў. Усё гэта мы ўжо ўбачылі ў Мінску. Сёння ж на парадку дня значыліся медальныя паядынкі. У фінале "Залатой шайбы" сышліся "Грыфоны", якія прадстаўляюць Цэнтральны раён сталіцы, і "Сокал" з Горацкага раёна Магілёўскай вобласці. У фінальнай сустрэчы Каляднага турніру скрыжавалі клюшкі фаварыты - каманда Прэзідэнта Беларусі - і расійская дружына. Вынікі матчаў, галоўныя акцэнты турніру і, вядома ж, эмоцыі - у Станіслава Ліпскага.
20 матчаў, 5 спаборніцкіх дзён, 12 каманд, больш за дзвесце хакеістаў - сярод дэбютантаў зборныя ІІХФ і Балтыі. Калядны турнір аматараў працягвае пашыраць межы: на Раство традыцыйна балельшчыкаў чакала святочная праграма, яшчэ большы акіян эмоцый і, зразумела, медальныя разборкі!
Чэмпіён свету па хакеі з Расіі Андрэй Нікалішын турнір у Мінску лічыць чымсьці чароўным. Дзе яшчэ ў свеце на працягу 5 дзён юныя хакеісты адзін лёд могуць падзяліць з легендамі гэтай гульні. Я аб удзельніках "Залатой шайбы" - іх фінал завяршыўся перад галоўнай гульнёй Каляднага турніру.
У цяперашнім розыгрышы "Залатой шайбы" была падаплёка. Галоўныя фаварыты "Грыфоны" год таму не здолелі заваяваць кубак, таму да турніру рыхтаваліся дасканала. На адным дыханні прайшлі ўсю дыстанцыю, праўда, у фінале так і не сустрэліся з крыўдзіцелямі. "Сокал" з Горак адчуў усю моц кідкоў мінчан 10:3.
Як прызнаўся Дзмітрый Баскаў, за гэтыя некалькі дзён яго хакеісты прыкметна пасталелі, узмужнелі, гледзячы на зорных гульцоў з Каляднага турніру. Няма сумненняў, што гэта датычыцца і каманды "Атлант" з Кобрынскага раёна Брэсцкай вобласці: яна заняла трэцяе месца, абгуляўшы ў матчы за бронзавыя ўзнагароды аднагодкаў з "Прынёманскіх ястрабаў".
Пасля завяршэння фінальнага матча пераможцы і прызёры турніру атрымалі ўзнагароды, кубкі і падарункі. Мікалай Лукашэнка быў прызнаны лепшым бамбардзірам "Залатой шайбы" - 10 галоў + 9 асістаў, ён жа ўвайшоў і ў сімвалічную зборную. Найбліжэйшы праследавальнік у спісе бамбардзіраў Іван Кузьміцкі з "Атланта" адстаў на пяць балаў.
Крыху раней на галоўнай пляцоўцы "Чыжоўка-Арэны" ў бітве за трэцяе месца шасціразовыя бронзавыя і двойчы сярэбраныя прызёры Каляднага турніру фіны сустракаліся з камандай ААЭ.
Паядынак атрымаўся звышупартым, толькі на сорак восьмай хвіліне паўночнікі ўпершыню выйшлі наперад 3:2, капітан Макіяха закінуў, следам Нінімякі вызначыўся.
Сяргей Задзяленаў, які сёння працуе ў ААЭ і дапамагае развіваць хакей у гэтай краіне, скараціў адставанне ў ліку. Паўднёўцы ўзялі тайм-аўт, знялі варатара, але пераламаць ход сустрэчы не атрымалася - 6:3 сёння фіны мацнейшыя.
Сярод тых, хто падтрымліваў сёння фінаў, быў Арцём Лаўшык. Юны балельшчык упершыню на хакеі, больш за тое, яму пашчасціла выйсці на лёд адразу пасля фінальнай сірэны паядынку за бронзу. Падзея і для малыша, і для яго мамы Алены - вельмі эмацыйная: вось так узнікае закаханасць у хакей.
"Чыжоўка-Арэна" тым часам прымала гасцей фінальнай сустрэчы. Традыцыйная музычная праграма побач са спарткомплексам і непасрэдна ў ім яшчэ больш падагравала цікавасць да фінальнага паядынку паміж камандай Прэзідэнта Беларусі і дружынай з Расіі.
Гаспадары турніру 12-ы раз сустрэліся з расіянамі ў фінале. З тузіна матчаў беларусы выйгралі 9, значылася фаварытам каманда Прэзідэнта і сёння, і ўжо на старце сустрэчы гэты статус гаспадары сталі пацвярджаць.
Пад халодны душ патрапілі нашы сапернікі на першай хвіліне: спачатку Яраслаў Чупрыс вызначыўся, а праз 19 секунд з перадачы Кіраўніка дзяржавы Корса закінуў.
На 14-й хвіліне перавага беларусаў стала трохразовай: Аляксандр Лукашэнка кідаў - галкіпер клюшкай адбіў удар, але на дабіванні Андрэй Асташэвіч быў бездакорны. 3:0 вынік траціны матча.
Аляксей Круцікаў у другім перыядзе зрабіў лічбы 4:0 на карысць беларусаў; здалося, што барацьбы ў матчы не атрымаецца, але дубль Сяргея Арыкаева інтрыгу вярнуў. Аднак, узняўшы тэмп, гаспадары зноў перавагу зрабілі вялікай: Слыш, Кальцоў і Аляксандр Лукашэнка вызначыліся - Лучынкін зрабіў лік 3:7.
Трэці перыяд выйгралі расіяне 2:1, на дакладны кідок Андрэя Асташэвіча дублем адказаў Павел Бойчанка, на большае апанентам беларусаў сёння ні часу, ні сіл не хапіла 8:5!
Перамога каманды Кіраўніка дзяржавы.12-ы тытул трыумфатара Каляднага турніру заваявала лядовая дружына Прэзідэнта Беларусі.
