Толькі што мы атрымалі матэрыял з шведскага Эстэрсунда, дзе ўжо заўтра стартуе алімпійскі сезон для біятланістаў - першы этап Кубка свету. У нядзелю адразу 2 гонкі з удзелам наймацнейшых спартсменаў планеты. І як нам стала вядома, з самай першай гонкі на лыжню выйдзе зорка сусветнага біятлона, трохразовая алімпійская чэмпіёнка Дар'я Домрачава. У Эстэрсунд яна прыехала са сваёй сям'ёй - тытулаваным мужам Оле Эйнар Б'ёрндаленам і падгадаванай дачкой Ксюшай. Нам удалося запісаць эксклюзіўнае інтэрв'ю.
Хто яшчэ прадставіць Беларусь - ведае Ганна Эйсмант. Гэта стадыён Эстэрсунда - адзін з самых паўночных біятлонных стадыёнаў у свеце. Яшчэ 100 км на поўнач - і ўжо палярны круг! Але тэмпература, паводле прагнозаў сіноптыкаў, на найбліжэйшыя дні абяцае быць цалкам біятлоннай - невялікі мінус, і, як заўсёды, тут няма праблем са снегам. Траса не выклікае нараканняў, але ёсць нюансы.
Усе сакрэты падрыхтоўкі лыж сэрвісмены, вядома, не выдаюць. Але вось зусім не сакрэт, хто ж будзе прадстаўляць нашу краіну ў новым алімпійскім біятлонным сезоне. Не толькі наша ўвага, але і ўвага ўсяго біятлоннага свету прыкаваная да Дар'і Домрачавай, якая праводзіць першы паўнавартасны сезон пасля вяртання з дэкрэту. Дар'я рыхтавалася індывідуальна, але пастаянна трымала сувязь з камандай, правяла некалькі сумесных збораў.
Яшчэ адзін правераны баец у нашай жаночай камандзе - Надзея Скардзіна.
Зусім нядаўна на міжнародных спаборніцтвах у нарвежскім Шушэне, дзе наша каманда праходзіла заключны перадсезонны збор, Надзея заняла другое месца ў спрынце, а следам на п'едэстале з'явілася Ірына Крыўко - і абедзве спартсменкі прайшлі гонку без промахаў! Ірына рыхтуецца выйсці на старт ужо заўтра ў суперміксе. Кампанію Ірыне Крыўко складзе Антон Смольскі - навічок каманды, таленавіты малады спартсмен, прызёр леташняга юніёрскага чэмпіянату свету.
Пасля супемікса разыграюць п'едэстал у змяшанай эстафеце. У нашым квартэце - Дар'я Домрачава, Надзея Скардзіна, Сяргей Бачарнікаў і Уладзімір Чапелін.
Нагадаю, што летась у Эстэрсунде Уладзімір Чапелін заваяваў бронзу ў індывідуальнай гонцы, на трэцюю прыступку п'едэстала паднімалася і Дар'я Юркевіч. Будзем спадзявацца, што і сёлета біятлонны бог будзе добразычлівы да нас.
Заўтра, 26 лістапада, старт сезона абяцае быць больш чым яркім - адразу дзве гонкі. Супермікс - пачатак прамой трансляцыі на "Беларусь 5" у 16:05! А ўжо ў 19:10 на "Беларусь 2" вы станеце сведкамі змяшанай эстафеты.
Хварэем за беларускіх спартсменаў!
