Дзмітрый Лазоўскі і Мікіта Лабастаў гэтымі днямі сталі чэмпіёнамі свету па летнім біятлоне

24 Жніўня 2019

Звернем увагу на тых таленавітых спартсменаў, якія ў найбліжэйшыя гады будуць цесна асацыіравацца з беларускім біятлонам. Два нашыя юніёры  - Дзмітрый Лазоўскі і Мікіта Лабастаў  -  гэтымі днямі сталі чэмпіёнамі свету па летнім біятлоне і дабіліся гэтага дасягнення на вачах сваіх балельшчыкаў. Раўбічы зноў дораць нам шмат станоўчых эмоцый і надзею на тое, што таленты ў біятлоне будуць прабівацца нават пасля таго, як са спорту сышлі Дар'я Домрачава і Надзея Скардзіна. 

Расказвае Андрэй Казлоў.

У перапынках паміж гонкамі ў Раўбічах цячэ сваё, мернае жыццё. Юныя беларускія біятланісты вяртаюцца пасля гонак і інтэрв'ю ў мікст-зоне на сваю базу - вось у гэтую ўтульную гасцініцу. І вось так выпадкова можна сустрэць як алімпійскіх чэмпіёнак Дар'ю Домрачаву і Надзею Скардзіну, так і Дзмітрыя Лазоўскага, які  некалькі гадзін таму стаў чэмпіёнам свету па летнім біятлоне. 

З такой прыгожай перамогай Дзмітрыя павіншаваў Прэзідэнт Беларусі Аляксандр Лукашэнка: "Малайчына! Такія перамогі - важны этап для станаўлення спартсменаў, здольных змагацца за самыя высокія месцы на найбуйнейшых спартыўных спаборніцтвах. Жадаю табе і ўсім беларускім юніёрам паспяхова прайсці гэты шлях да вяршыні спартыўнага Алімпа". 

У пакоі хлопца і той медаль, які зараз зойме ганаровае месца ў яго калекцыі. І сапраўды стане стартам вялікага спартыўнага шляху. Сакрэт поспеху чэмпіён свету нам таксама раскрыў. 

Поўную версію інтэрв'ю з чэмпіёнам свету абавязкова глядзіце заўтра ў праграме "Галоўны эфір" на "Беларусь 1"

Медаль Дзмітрыя Лазоўскага ў спаборніцтвах юніёраў стаў другім для беларускіх спартсменаў. Напярэдадні, нагадаем, Мікіта Лабастаў стаў лепшым у новай дысцыпліне - суперспрынце. З залатым медалём Мікіту таксама павіншаваў Прэзідэнт Беларусі Аляксандр Лукашэнка, які адзначыў, што першая ўзнагарода нашых спартсменаў на  дамашнім сусветным першынстве ў Раўбічах завабіць на трыбуны яшчэ больш балельшчыкаў і надасць упэўненасці беларускім біятланістам. 

Наогул, біятлон як асобна ўзятая культура - гэта не толькі агнявыя  рубяжы і ход па дыстанцыі. Тут шмат  цікавых дэталяў. Напрыклад, мы часта на розных інфармацыйных рэсурсах сустракаем фатаграфіі, зробленыя ў хвіліны гонак. Шмат у чым гэта заслуга галоўнага беларускага фотаспецыяліста Дзяніса Касцючэнкі. 

Ну і атмасфера на трыбунах не абмяжоўваецца хвілінамі, калі на дыстанцыі спаборнічаюць біятланісты. Тыя, хто не ўпершыню трапіў у Раўбічы, ужо ведаюць, што галасы Ганны Любянковой і Максіма Югава сталі асаблівасцю нашай біятлоннай культуры. 

Але самае цікавае тое, што адбываецца на трасе. Бо як толькі біятланіст пакідае  агнявыя рубяжы,  пачынаецца цяжкі шлях па дыстанцыі. Не паспелі мы ўключыць нашу тэлекамеру, як зафіксавалі адразу некалькі цікавых момантаў.

Пасля юніёраў на трасу ў Раўбічах выйшлі  дарослыя біятланісты. Спачатку мужчыны спаборнічалі ў спрынце. І два беларусы ў выніковым пратаколе фінішавалі ў топ-10. Сяргей Бачарнікаў спыніўся  за секунду ад п'едэстала. 

Але тым больш  цікава будзе заўтра нам сачыць за гонкамі праследавання. У тым ліку і за жаночай. Лепшая з беларусак Ганна Сола будзе стартаваць 17-й. Дарэчы, у жаночым спрынце здарыўся ўнікальны момант. З аднолькавым часам фінішавалі расіянка Глазырына і чэшка Чэрватава. 

Адзначым, што для прыхільнікаў біятлона курсіруе спецыяльны экспрэс-маршрут № 449Э, які стартуе ад станцыі метро "Барысаўскі  тракт" з канчатковым пунктам у Раўбічах. Час адпраўлення першага рэйса - 9 раніцы, апошні адправіцца ў Раўбічы ў 18:30. 

Да завяршэння галоўнай біятлоннай падзеі гэтага лета застаецца адзін спаборніцкі дзень. Не прапусціце!