Каманда "Партызан" з Мінска стала пераможцам фіналу рэспубліканскіх спаборніцтваў па хакеі "Залатая шайба" ў малодшай узроставай групе.
Вырашальныя паядынкі прайшлі на лядовай арэне ў Оршы. За медалі змагаліся хакеісты дывізіёна А. Гэта каманды з гарадоў, дзе ёсць спартыўныя аб'екты са штучным лёдам. У фінале прынялі ўдзел восем лядовых дружын, якія прайшлі адборачныя спаборніцтвы. Другое месца ў фінальным матчы дасталася камандзе Мінскай вобласці, а трэцяе вырвалі "Прынёманскія ястрабы" з Гродзенскай вобласці.
Для юных хакеістаў удзел у "Залатой шайбе" - выдатная магчымасць заявіць пра сябе. На гэтым тыдні вызначыцца і лепшая каманда малодшай узроставай групы дывізіёна Б. Фінал рэспубліканскіх спаборніцтваў праходзіць у Лідзе. А з 27 па 29 сакавіка ў Пружанах на лёд выйдуць хакеісты гэтага ж дывізіёна старэйшай узроставай групы.
