Для беларускіх спартсменаў на Алімпіядзе ў Пхёнчхане сёння дзень адпачынку. Праўда, расслабляцца ніхто не збіраецца. Біятланісткі на кантрольнай трэніроўцы рыхтуюцца да заўтрашняй эстафеты, а канькабежцы наразаюць кругі на веласіпедах. Сваіх жалезных коней, гавораць, прывезлі з Мінска.
Ніжні алімпійскі кластар. Горад Канын - гэта не толькі эканамічны цэнтр рэгіёна, але яшчэ і папулярны курорт. Але здаецца, упершыню зімой ля гэтых берагоў Японскага мора так шматлюдна. Тысячы турыстаў падчас Гульняў прыязджаюць сюды, каб зрабіць фота на памяць. Асаблівая ўдача - сустрэць спартсмена.
Гэта наша канькабежка Марына Зуева. Хтосьці здзівіцца: навошта на зімовых Гульнях веласіпед? Але велатрэніроўкі - абавязковая частка падрыхтоўкі. Двухколавых коней з Мінска возяць на ўсе спаборніцтвы. На гэтых Гульнях Марына Зуева дэбютант. На дыстанцыі 5 кіламетраў была сёмай.
Зараз Марыне 25. А ў 17 яна пакінула спорт. Праз некалькі гадоў вырашыла паспрабаваць сябе ў роліках, нават выйграла марафон у Эстоніі. Пасля чаго ўсё-такі вярнулася на канькі. Алімпіяда ў Пхёнчхане была марай. У мінулым тры гонкі, найбліжэйшая 24 лютага - мас-старт. Сваім кумірам Зуева лічыць Дар'ю Домрачаву.
Сярэбраны прызёр гэтых Гульняў напярэдадні ў складзе беларускага квартэта змагалася ў змяшанай эстафеце. Па традыцыі стартарам выступіла Надзея Скардзіна, якая, пацвердзіўшы статус адной з самых трапных біятланістак, адстраляўшыся на нуль, перадала Домрачавай восьмую пазіцыю. Дар'і на другім рубяжы спатрэбіўся адзін патрон, але нагамі трохразовая алімпійская чэмпіёнка адыграла пяць пазіцый і моцнай палове каманды перадала трэцяе месца ў эстафеце. Сяргей Бачарнікаў хоць і дапусціў адзін промах, не змог утрымацца ў тройцы лідараў. Завяршаў камандную гонку Уладзімір Чапелін з адным дадатковым патронам на пятай пазіцыі, даказаўшы, што з прызнанымі лідарамі можам змагацца на роўных.
Перамогу ў гэтай прэстыжнай гонцы святкавалі французы, у тройку лідараў трапілі нарвежцы і італьянцы. Заўтра ў нашай каманды яшчэ адзін шанц - жаночая эстафета. Ну а сёння біятланісткі правядуць сваю заключную трэніроўку перад фінальным боем.
