Пачынаем з турніру, які ў першыя дні новага года, заўсёды з намі. Калядны, хакейны, міжнародны. Трынаццаты год запар да нас з'язджаюцца хакеісты з розных кантынентаў пазмагацца за кубак і зноў адчуць цудоўную атмасферу і спартыўнай барацьбы, і падтрымкі гледачоў, і сяброўскіх зносін.
Турнір з прыстаўкай "аматарскі", але фармулёўка хутчэй фармальнасць. Бо сярод гульцоў - пераможцы і прызёры чэмпіянатаў свету, Алімпійскіх гульняў, хакеісты, якія выступалі ў Нацыянальнай хакейнай лізе - калядны россып зорак - ні больш, ні менш.
Яго называюць неафіцыйным чэмпіянатам свету. Сапраўды, аналагічных турніраў на планеце няма, а цяперашні яшчэ і рэкордны па ліку краін-удзельніц - іх паўтара дзясятка. Варта адзначыць, што гледачам нудзіцца сапраўды не прыходзілася: каманды ў закрыты хакей гуляць не хацелі і камбінацыі паказвалі на любы густ. 145 шайб за 14 гульняў турніру - у сярэднім больш за 10 шайб за адну сустрэчу. Варта таго, каб прыйсці на "Чыжоўка-Арэну".
Тым больш, што вялікае свята хакея паводле традыцыі даступнае ўсім - уваход на матчы абсалютна свабодны і зусім не дзіўна, што слова "аншлаг" суправаджала шматлікія паядынкі. Беларусы хварэлі актыўна за ўсіх, але больш, вядома, за сваіх: каманда Кіраўніка дзяржавы - нязменны і самы тытулаваны ўдзельнік Каляднага турніру.
А вось чым завяршыліся паядынкі, раскажа Станіслаў Ліпскі. Ён назіраў за хакеем не толькі з трыбуны. Эмоцыі, уражанні і найбольш яркія моманты турніру, дзе перамагае наймацнейшы, але не прайграе ніхто - у нашым наступным матэрыяле.
Хоць і 13-ы па ліку, але ўсё такі ж пазітыўны, а для многіх нават шчаслівы.
Ерка Хапонен, абаронца аматарскай каманды Фінляндыі па хакеі: "У мяне не атрымалася прыехаць мінулы раз, але два гады таму я ўжо быў на турніры, што змянілася: арганізацыя стала яшчэ лепш, Мінск стаў прыгажэйшым - шчаслівы зноў прыехаць у Беларусь".
Ігар Касцюкоў, капітан аматарскай каманды Расіі па хакеі: "Дзякуй за запрашэнне, кіраўніцтву Рэспублікі - 13 гадоў захоўваць стабільнасць праводзіць турнір на такім высокім узроўні - дарагога каштуе".
Вялікі хакей напярэдадні Раства - гэта ўжо наша беларуская.
Драгас Іардачэ, нападаючы аматарскай каманды Балкан па хакеі: "Наша каманда дэбютант, але мы поўныя рашучасці паказаць усё, на што мы здольныя. Складаней за ўсё будзе гуляць супраць вашай каманды, бо ў складзе Прэзідэнт Беларусі, у паядынку супраць гаспадароў галоўнае шмат шайб не прапусціць".
Сёлета ў Мінск на турнір прыехалі 7 каманд, гаспадары лёду дапаўняюць актэт. Дэбютанты - каманда Балкан, за якую выступаюць прадстаўнікі васьмі незалежных дзяржаў. Аб беларускай хакейнай гасціннасці зараз даведаюцца і ў Балгарыі, Босніі і Герцагавіне, Македоніі, Румыніі, Сербіі, Славеніі, Турцыі і Харватыі.
Каманда Балкан прыехала ў Мінск вучыцца хакею, каб развіваць яго ў сябе на радзіме. І тут супрацоўніцтва ўзаемавыгаднае - Мінск зноў жадае прыняць у сябе чэмпіянат свету. Галасаванне ўжо ў маі. На такіх калядных турнірах спартыўная дыпламатыя і атрымлівае перамогі.
Марцін Міланаў, прэзідэнт Балгарскай федэрацыі хакея: "На жаль, у нашай краіне не глядзяць так на спорт, як тут.
Ёсць магчымасці, каб мы пасылалі найлепшых балгарскіх дзяцей, якія могуць трэніравацца і вучыцца тут. Таму што ў вас асяроддзе ў сто разоў лепшае, чым у нас у нашым відзе спорту".
"Аднак, акрамя дамоўленасці аб супрацоўніцтве паміж Хакейнай федэрацыяй Беларусі і дзяржавамі Балканскага паўвострава, гэтым рашэннем наша краіна практычна гарантавала сабе такія неабходныя галасы ў момант выбару краіны - гаспадыні чэмпіянату свету 2021 або 2022 года на выканкаме ІІХФ, на які мы прэтэндуем, пры гэтым вага гэтых галасоў па ўплывовасці такая ж, як, напрыклад, Канады або Расіі".
Жэрабя звяло гаспадароў лёду са зборнымі ААЭ, Балкан і Швейцарыі. Каманды Групы А правялі свае матчы на вялікай пляцоўцы "Чыжоўка-Арэны". У Групе В выступілі фіны, славакі, расіяне і хакеісты Германіі. Нечакана, але ў матч за бронзу прабіліся хакеісты ААЭ і нядзіўна - славакі, у фінале, як і летась, ізноў сустрэліся гаспадары турніру і фіны.
Традыцыйна вось ужо як пяты год запар у дні турніру ўдзельнікі старту ўдзельнічаюць і ў дабрачынным праекце Прэзідэнцкага спартыўнага клуба і Федэрацыі хакея Беларусі "Калядная традыцыя", якая адзначыла свой першы маленькі юбілей. Сёлета гасцей сустракае Маладзечанская спецыяльная агульнаадукацыйная школа-інтэрнат №2 для дзяцей з парушэннямі зроку.
Хамель Аль-Кубейсі, віцэ-прэзідэнт Федэрацыі лядовых відаў спорту ААЭ: "Гэта акцыя - адна з галоўных падзей усяго Каляднага турніру, і мы вельмі рады зноў удзельнічаць у ёй. Што можа быць лепш, чым бачыць шчаслівыя твары гэтых дзяцей і іх усмешкі".
Прыязджаюць хакеісты не з пустымі рукамі. Вось і на гэты раз - аэрахакей ад каманды Прэзідэнта, ноўтбукі, планшэты і настольныя гульні ад гасцей турніру. Напярэдадні школа-інтэрнат атрымала бязвыплатную спонсарскую дапамогу ад Прэзідэнцкага спартыўнага клуба і Беларускай федэрацыі хакея ў суме 25 тысяч беларускіх рублёў.
Галоўным жа ўпрыгажэннем турніру стаў фінал, яго шыльда паўтарылася з мінулага года - Беларусь-Фінляндыя. Тады прадстаўнікі краіны суомі прапусцілі перамогу толькі ў трэцім перыядзе 1:2.
Але ўсё ж пад націскам гаспадароў не выстаялі фіны і на гэты раз: Кіраўнік дзяржавы ў свой актыў запісаў адну галявую перадачу пры шостым узяцці варот і тым самым дапамог сваёй камандзе здабыць агульную вікторыю 7:3, для Аляксандра Лукашэнкі гэты бал стаў 101-ым па сістэме гол плюс пас за ўвесь час выступлення на калядных турнірах - лічбы гросмайстарскія. Непасрэдна на 13 турніры ў Прэзідэнта пяць дакладных кідкоў і чатыры асістэнцкія балы - па гэтым паказчыку ён у ліку лідараў, у спісе бамбардзіраў гэта трэцяе месца. Хваляваліся за беларусаў напярэдадні фіналу нашы палярнікі, якія зараз знаходзяцца ў экспедыцыі на Паўднёвым полюсе.
Такім чынам, беларусы дзясяты, юбілейны для сябе, раз выйграюць Калядны турнір, фіны другі раз становяцца сярэбранымі прызёрамі, нагадаем, таксама ў іх актыве і шэсць бронзавых п'едэсталаў. У матчы за трэцяе месца крыху раней сышліся каманды ААЭ і Славакіі, і калі для дружыны Юліяса Шуплера гэта абсалютна чакана, то вось нашы сябры з Блізкага Усходу ўсё ж здзівілі, прабіўшыся ў плэй-оф, дзе скокнулі вышэй за галаву, перайграўшы 4:3 славакаў.
Нягледзячы на тое, што прызавых месцаў усяго тры, турнір, першым чынам, носіць сяброўскі характар, таму прайграўшых апрыёры тут быць не можа. Хтосьці ў Мінску сустрэў сваіх былых напарнікаў па камандах, хтосьці сустрэў сяброў, хтосьці зноў пагрузіўся ў атмасферу лядовых баталій, хтосьці вызначыўся з вектарам развіцця хакея ў сваёй краіне, мы ж - беларусы - чарговы раз падкрэслілі - спорт аб'ядноўвае і, прынамсі, на беларускай Зямлі будзе аб'ядноўваць людзей і народы заўсёды.
