"Дзень футбола і дружбы" аб'яднаў сёння юных гульцоў адразу двух клубаў. На гарадскім стадыёне ў Барысаве ў таварыскім матчы сустрэліся футбалісты юнацкай каманды БАТЭ і клуба "Мінск". Гэта гульня стала падрыхтоўкай барысаўскага клуба да ўдзелу ў міжнародным сацыяльным праекце "Футбол для дружбы". Ужо ў пачатку чэрвеня юныя футбалісты з 24 краін свету, у тым ліку з Беларусі, збяруцца на 3-м міжнародным форуме дзіцячых каманд у Берліне.
А вось вынік сустрэчы ў Барысаве ведае наш карэспандэнт Наталля Тарасюк.
Юнацкая каманда БАТЭ практычна на першых хвілінах матча распячатвае вароты аднагодкаў з клуба "Мінск". І калі сёння для хлопцаў гэта спартыўная сустрэча - таварыскі матч праекта "Футбол для дружбы", то ўжо на наступным тыдні сапернікі могуць сустрэцца зноў - на чэмпіянаце Мінска. Далей каманду БАТЭ чакаюць ужо на футбольным фестывалі ў Пецярбургу ў канцы мая.
Чарговы пас і гол… Большую частку часу матч прайшоў ля варот клуба "Мінск". На гарадскім стадыёне Барысава хлопцы з БАТЭ змаглі прадэманстраваць сваё майстэрства. Гульня завяршылася з лікам 6:1 на карысць юных футбалістаў БАТЭ.
Матч усё ж таварыскі. У пачатку гульні юныя футбалісты БАТЭ абмяняліся з сапернікамі бранзалетамі сяброўства. Гэта традыцыя і сімвал здаровага ладу жыцця. Зялёны і сіні - гэта яшчэ і два колеры міжнароднага праекта "Футбол для дружбы".
Каманда БАТЭ зрабіла настрой сваім балельшчыкам. На трыбунах стадыёна сабраліся дзясяткі юных прыхільнікаў футбола. Для іх арганізавалі яшчэ і інтэрактыўную пляцоўку. А ў перапынку музычнае выступленне.
Гэты матч не толькі добрая магчымасць памерацца сіламі з іншымі гульцамі, але і этап падрыхтоўкі барысаўскага клуба да ўдзелу ў сацыяльным праекце "Футбол для сяброўства".
Пераможны настрой юным футбалістам БАТЭ важна не страціць. Бо больш значныя матчы яшчэ наперадзе. Камандзе трэба будзе выйсці на поле ў Берліне і згуляць з аднагодкамі ў турніры па міні-футболе. У фінале праекта "Футбол для дружбы" ўдзельнічаюць, апроч Беларусі, каманды яшчэ з 23 краін свету.
