Дар'я Домрачава трыумфальнай перамогай завяршыла біятлонны сезон на этапе Кубка свету ў Цюмені

26 Сакавіка 2018

І зноў перамога, і зноў біятлонныя балельшчыкі ў Беларусі радуюцца! Дар'я Домрачава трыумфальна завяршыла сезон. На апошнім этапе Кубка свету ў Цюмені чатырохразовая алімпійская чэмпіёнка выйграла спрынт, а напярэдадні спартсменцы не было роўных у мас-старце.

З перамогай Дар'ю Домрачаву павіншаваў Прэзідэнт Беларусі: "Дарагая Даша! Віншую з бліскучым завяршэннем сезона 2017-2018 года - залатым медалём у апошнім старце этапу Кубка свету ў Цюмені. Гэта была прыгожая перамога ў вельмі прыгожай гонцы. Ты чарговы раз паказала свае лепшыя чэмпіёнскія якасці: выбітны талент, выключную працаздольнасць і невычарпальнае імкненне да найлепшага выніку. Жадаю табе моцнага здароўя і паспяховай падрыхтоўкі да новага сезона!"

На прэс-канферэнцыі Дар'я адзначыла, што гэтая перамога - выдатнае завяршэнне няпростага сезона. Падзеі гонкі і вынікі біятлоннага года ў Крысціны Камыш.

На этапе Кубка свету ў Цюмені Міжнародны саюз біятланістаў пакінуў самы відовішчны від праграмы - мас-старт - на фінал усяго сезона. Па выніках менавіта гэтай гонкі вызначылася ўладальніца Вялікага хрустальнага глобуса.

Да першай стральбы чатырохразовая алімпійская чэмпіёнка бегла ў першай пяцёрцы. На стартавай лёжцы Дар'я правяла шмат часу, затое была дакладная. А затым у гонцы завязалася сапраўдная барацьба - ніхто не хацеў саступаць. І Домрачава, і фінка Макарайнен, і немка Дальмаер, і славачка Кузьміна паказвалі свае лепшыя секунды. Такі ж сцэнарый быў і пасля другога агнявога рубяжа, дзе беларуска зноў не памылілася. Спатыкнулася чатырохразовая алімпійская чэмпіёнка на першай стральбе стоячы. Яна дапусціла адзін промах і адправілася на штрафны круг. Аднак Дар'і атрымалася ходам адыграць 10 секунд з 28. На заключным агнявым рубяжы Домрачава доўга цэлілася ў апошнюю мішэнь. Папала, сышла на дыстанцыю пятай і за кіламетр да фінішу вырвалася ў лідары. І завяршыла сезон прыгожай перамогай.

У выніку ў беларускі 10-я перамога ў мас-старце і 34-я ў кар'еры. Домрачава зраўнялася ў іх колькасці з легендарнай немкай Магдаленай Нойнер.

Дар'я Домрачава ў гэтым сезоне 9 разоў паднімалася на п'едэстал і заняла ў Кубку свету трэцяе месца. У актыве чатырохразовай алімпійскай чэмпіёнкі па выніках сезона - 804 ачкі. Вялікі хрустальны глобус выйграла фінка Кайса Макарайнен. Дар'і да трафею не хапіла ўсяго 18 балаў.

Зараз Домрачава разам са сваім мужам Уле-Эйнарам Бьёрндаленам адправіцца ў Нарвегію, дзе іх чакае дачка.