Дзве ўзнагароды (абедзве вышэйшай пробы) заваяваныя ў барацьбе.
Гімн Беларусі ў Палацы спорту спачатку гучаў у гонар трыумфальнага выступлення Ірыны Курачкінай у вазе да 57 кілаграмаў. З перамогай спартсменку павіншаваў Прэзідэнт Аляксандр Лукашэнка. "Ты зрабіла гэта дзякуючы свайму валявому характару, майстэрству і вытрымцы - тым якасцям, якія і ў будучыні дазволяць табе трымацца на вяршыні Алімпа. Малайчына!" - адзначыў беларускі лідар. Затым па золата паднялася Васіліса Марзалюк (катэгорыя 76 кг). Чэмпіёнку таксама павіншаваў Кіраўнік дзяржавы. "Золата - годная ўзнагарода за майстэрства, самааддачу і адданасць барацьбе. Ты - наш гонар!" - гаворыцца ў віншаванні. На рахунку барцоў такім чынам ужо чатыры медалі. У вольнай барацьбе серабро камандзе прынёс Алі Шабанаў, бронзу Аляксандр Гуштын.
Напярэдадні паспяховым выступленнем балельшчыкаў на стадыёне "Дынама" парадавалі і нашы лёгкаатлеты. Яны сталі другімі ў камандным турніры. Спаборніцтвы праводзіліся ў новым фармаце дынамічнай лёгкай атлетыкі. Па выніку адбораў за медалі змагаліся шэсць зборных. Гаспадароў апярэдзілі толькі ўкраінцы, трэці радок у Германіі.
У гаспадароў перамогі ў сваіх відах атрымалі Крысціна Ціманоўская ў спрынце, бар’ерысты Эльвіра Герман і Віталь Парахонька, Максім Недасекаў у скачках у вышыню і Таццяна Халадовіч у кіданні кап’я. Апошняя паказала адзін з самых высокіх сусветных вынікаў у цяперашнім сезоне - 67 метраў 22 сантыметры.
Дарэчы, менавіта на Еўрапейскіх гульнях Таццяна Халадовіч выканала кваліфікацыйны нарматыў на Гульні чатырохгоддзя.
А на велатрэку бронзавую ўзнагароду заваявала Ганна Церах у скрэтчы. У фінальным заездзе лепш за гаспадыню выступілі толькі чэмпіёнка Кірстэн Вільд з Нідэрландаў і італьянка Марціна Фіданца.
Чатыры медалі прынёс зборнай Беларусі восьмы дзень II Еўрапейскіх гульняў
29 июня 2019