Пра гэтых спартсменаў гавораць, што медальны план яны нават перавыканалі, праўда, гаворка ідзе пра чэмпіянат свету па веславанні на байдарках і каноэ сярод юніёраў і моладзі, які прайшоў у Заслаўлі. А высокую ацэнку даў старшы трэнер юнацкай зборнай Аляксей Абалмасаў на ўшаноўванні пераможцаў і прызёраў спаборніцтваў.
Нагадаем, усяго ў планетарным першынстве прынялі ўдзел больш як 1300 атлетаў з 62 краін. І нашы спартсмены заваявалі 14 медалёў. З іх сем залатых, пяць сярэбраных, два бронзавыя. У агульнакамандным заліку наша зборная трэцяя. Адзначым, беларускія юніёркі прызнаныя лепшай камандай у класе каноэ. Алёна Наздрова і Надзея Макарчанка заваявалі 4 золата: два ў экіпажы каноэ-двойкі і па адным у асабістых спаборніцтвах.
Аляксей Абалмасаў, старшы трэнер юнацкай зборнай Беларусі па вяслярных відах спорту: "Цалкам задаволеныя спартсменамі. Нават больш як задаволены. Тое, што планавалі неафіцыйна, у сваіх галовах трэнерскіх, план быў нават трохі перавыкананы. Годна так перавыкананы. Шматлікія здзівілі. Арганізацыя, я лічу, таксама была на вышыні. І вось гэтая каманда з года ў год расце. Гэта значыць, я працую ўжо два гады. І ў тым годзе была рэкордная колькасць медалёў, спадзяюся, што будзем толькі дадаваць хоць бы па адным медалі за сезон".
Надзея Макарчанка, трохразовая чэмпіёнка свету па веславанні на байдарках і каноэ сярод юніёраў і моладзі: "Мы выступілі добра. Што змаглі, то зрабілі. Гэты чэмпіянат быў дома. Як бы зямля родная дапамагала. Усё завяршылася ўжо. Мы зараз будзем адпачываць, а потым пачнем трэніравацца да наступнага сезона. Але пакуль будзем адпачываць, вядома, будзем назіраць за Рыа і хварэць за нашых дзяўчын".
Алімпійскія гульні для весляроў на байдарках і каноэ стартуюць 7 жніўня. Апошнія медалі будуць разыграныя 20 жніўня.
