Наймацнейшыя спартсмены сёння сабраліся на адкрыцці чэмпіянату Беларусі па летнім біятлоне. У Раўбічы ацаніць новую трасу заявілася жаночая каманда, якая трыумфальна правяла Алімпійскія гульні ў Сочы. Гэта добрая магчымасць для маладога пакалення ўбачыць і пагутарыць са сваімі кумірамі.
Прысутнасць трохразовай алімпійскай чэмпіёнкі Дар'і Домрачавай матывуе і прыцягвае моладзь на дасягненне высокіх вынікаў у спорце. Усе падрабязнасці з Раўбіч у нашага карэспандэнта - Мікалая Стула.
Біятлонныя трансляцыі ў Беларусі вось ужо некалькі гадоў маюць самы высокі тэлерэйтынг. Ён просты і зразумелы ўсім - як спецыялістам, так і хатнім гаспадыням. А галоўнае - біятлон непрадказальны. Часам адна гонка закручвае такія хвацкія сюжэты, што ніякія серыялы не параўнаюцца. Пасля Алімпіяды ў Сочы папулярнасць гэтага віду спорту неверагодная. Дар'я Домрачава і Надзея Скардзіна здзівілі свет, сталі нацыянальнымі героямі.
Мінск. Дзень горада, у парку Горкага праводзяць гарадскі біятлон. Трыумфатары апошніх Алімпійскіх гульняў настолькі папулярныя, што да іх прыстаўлена ахова. Інакш нельга - паляўнічых за аўтографамі і фота Домрачавай і Скардзіны вельмі шмат.
Біятлон у спісе прыярытэтаў і дзяржаўнай палітыкі. Прэзідэнт краіны і Нацыянальнага алімпійскага камітэта Аляксандр Лукашэнка напярэдадні старту новага сезона знаходзіць час, каб пагутарыць і сказаць словы ў наказ лідару каманды Дар'і Домрачавай. Папулярнасць Дашы трэба выкарыстаць для прыцягнення моладзі да спорту. Беларуская федэрацыя біятлона гэта з поспехам робіць.
Чэмпіянат Беларусі па летнім біятлоне стартаваў сёння ў Раўбічах. Акрамя нашых атлетаў, тут яшчэ і спартсмены з-за мяжы. Урачыстае адкрыццё, шырокая праграма спаборніцтваў. Гонкі запланаваныя як сярод біятланістаў, якія ўжо адбыліся, так і сярод юніёраў. Статус мерапрыемства падняла і жаночая зборная краіны - у поўным складзе яна выпрабавала новую трасу і новае стрэльбішча.
Дар'я Домрачава перамагла. Пасля гонкі трэнерскі штаб на чале з пачаткоўцам аўстрыйцам Эдэрам доўга разбіраў вынікі стральбы. Нават пасля трыумфу ў Сочы федэрацыя біятлона не саромеецца вучыцца: на работу ў каманду запрашаюць замежных спецыялістаў высокага ўзроўню. Каб вынікі не падалі, ды і сваіх трэнераў падвучыць.
Альфрэд Эдэр, трэнер нацыянальнай зборнай Беларусі па біятлоне: Раўбічы зрабілі на мяне ўражанне. Як і сённяшняя работа Дар'і Домрачавай. Тут ёсць усё, каб спартсмены маглі прагрэсіраваць. Асабліва гэта важна для маладых.
Чэмпіянат Беларусі па летнім біятлоне сабраў усіх наймацнейшых, уключаючы Дар'ю Домрачаву. Але гэтыя спаборніцтвы важныя не столькі для трохразовай алімпійскай чэмпіёнкі, колькі для моладзі, якую яна пакуль абгульвае. Магчымасць страляць, збегчы, проста знаходзіцца побач з Домрачавай - вялікі матыватар для падрастаючага пакалення.
У Сочы ў беларусаў быў трыумф, але што далей. Ці падрастае годная змена, ды і ці можна ў сучасных кліматычных умовах з няўстойлівай зімой падрыхтаваць добрага біятланіста?
Адкрыты чэмпіянат Беларусі ў Раўбічах будзе доўжыцца ўвесь тыдзень. Гэта выдатная магчымасць ужывую ўбачыць куміраў, бо хутка яны з'едуць на снег. Сезон ужо не за гарамі.
