На старт 4 этапа Кубка Беларускай федэрацыі біятлона выйшлі больш за 150 юных снежных стралкоў з усёй краіны, і нават замежныя спартсмены.
Спаборніцтвы стартавалі ўпершыню ў гісторыі - менавіта на такіх стартах можна разгледзець самыя яркія маладыя таленты. За амаль два месяцы спартсмены пераадолелі 4 найскладанейшыя этапы, выходзілі на арэны міжнароднага ўзроўню і, вядома ж, лавілі хвалю падтрымкі, якую запускалі тысячы балельшчыкаў.
Тут жа свой першы сур'ёзны краш-тэст прайшла і эксперыментальная група маладых біятланістаў - кандыдатаў выбіралі з дапамогай сучасных навуковых методык. Ці атрымаўся спартыўны эксперымент, і які міжнародны выклік ужо праз тыдзень чакае лепшых спартсменаў турніру? Ян Пашкевіч - як працуе біятлонная фабрыка зорак.
Гадзіннік запавольвае свой ход - секунды да старту расцягваюцца ў вечнасць. Неверагодны тэмп часу вяртае толькі стартавы стрэл суддзі.
Фінальны рывок, каб даказаць усім - ты зможаш! Амаль за два месяцы 150 лепшых юных біятланістаў краіны пакінулі за спінай на лыжні тры найскладанейшыя этапы турніру ў Наваполацку. Гранд-фінал за першы ў гісторыі Кубак Федэрацыі біятлона прайшоў сярод снежных схілаў у Раўбічах.
На трасе лыжная гадзіна пік - бесперапынны рух задае масавы старт. Спартыўны краш-тэст снежным стралкам трэба вытрымаць не толькі ў барацьбе з сапернікамі – перагарэць можна і ад наймацнейшага зараду трыбун.
Эмацыйную буру над біятлоннай арэнай паднялі больш за дзве тысячы балельшчыкаў. Лічбавая панарама трасы адкрываецца прама з фан-зоны - агляд без меж транслявалі дзясятак камер Белтэлерадыёкампаніі. Схаваць было немагчыма нават першыя эмоцыі пераможца 10-кіламетровага заезду.
Экспрэс-падзарадку для спартсменаў адразу праводзяць балельшчыкі - праз імгненні пара на п'едэстал. Сакрэтны пакет з падарункам кожнаму прызёру падрыхтаваў чатырохразовы алімпіец Аляксандр Ціханаў - сувенір унутры апынуўся ручной працы.
Такі арт-румянец для віцебскіх біятланістак стаў сімвалам поспеху. Абнавіць імідж прапануюць і нашым алімпійцам - сардэчны мэйкап апынуўся пераможным.
Упершыню на старт выйшла і каманда з Маскоўскай вобласці. Нават у зімовы дзень іх сагравала энергія трыбун.
За два дні вялікая фан-зона на трыбунах станавілася нават працягам алімпійскага стадыёна ў Пхёнчхане - з беларускіх гор праз вялікі экран адкрыўся від і на схілы Паўднёвай Карэі. Затым увагу балельшчыкаў ізноў перахапілі юныя біятланісты.
Фінальная развязка ўсё бліжэй. Ад адрэналіну трэнерскія здольнасці з'яўляюцца нават у самых юных.
Тут жа цуды на снежных віражах і агнявых рубяжах дэманструе эксперыментальная група Беларускай федэрацыі біятлона. Прадказанне алімпійскага лёсу 13 дзяцей разлічылі па навуковых формулах. Вынікі эксперыменту адкрыюць ужо наступныя гульні.
Аднак за рысай фінішу новы старт - лепшыя снежныя стралкі ўжо праз тыдзень выйдуць на лыжню юніёрскага чэмпіянату свету па біятлоне ў Эстоніі.
Вышэй усіх, як і на карце Беларусі, так і ў камандным рэйтынгу апынулася Віцебская вобласць. Гэты год кубак правядзе на поўначы Беларусі. У наступным жа годзе аматараў спорту чакаюць новыя снежныя бітвы за пераходзячы трафей. Але найважнейшую ўзнагароду кожны юны спартсмен пакіне з сабою назаўжды.
