Фрыстайлісты праводзяць збор у Японіі, а біятланісты першымі прыляцелі ў сталіцу зімовай Алімпіяды. І вось ужо сёння ўся астатняя каманда Беларусі адправілася ў Паўднёвую Карэю - гэта зборныя па гарналыжным спорце, канькабежным, шорт-трэку і лыжных гонках. Сёння ў Пхёнчхане адкрыта алімпійская вёска, якую наведаў кіраўнік МАК Томас Бах. Эксклюзіў ад зборнай Беларусі па фрыстайле, чаканне беларускіх спартсменаў такой важнай падзеі ў іх кар'еры, навіны з Паўднёвай Карэі. Усё гэта ў рэпартажы Андрэя Казлова.
Расказвае Андрэй Казлоў.
Апошнія хвіліны беларускіх алімпійцаў перад вылетам на спаборніцтвы, якія ў кар'еры кожнага займаюць асаблівае месца. Фатаграфіі на памяць, званкі родным і блізкім і шматлікія інтэрв'ю, у якіх кожны асцярожна гаворыць аб сваіх мэтах і задачах у алімпійскім Пхёнчхане. За некалькі дзён больш як напалову павялічыўся склад зборнай Беларусі па канькабежным спорце. Кампанію ў Паўднёвай Карэі Ігнату Галавацюку і Марыне Зуевай складуць Ксенія Садоўская і Віталь і Таццяна Міхайлавы.
Дадатковая квота дазволіла і зборнай Беларусі па лыжных гонках заявіць яшчэ адну спартсменку - Валянціну Камінскую. Такім чынам склад павялічыўся да 8 чалавек, сярод якіх і будучы 7-разовы ўдзельнік Алімпійскіх гульняў Сяргей Далідовіч, якога на такія гістарычныя для ўсяго беларускага спорту Гульні праводзіла ўся сям'я.
Тым часам траса камандай вывучаная - летась у Пхёнчхане ў рамках перадалімпійскага тыдня адбыўся этап Кубка свету.
І менавіта зараз аўтобус з нашымі алімпійцамі адпраўляецца ў Нацыянальны аэрапорт Мінск, ужо адтуль нашы спартсмены возьмуць курс на паўднёвакарэйскі Пхёнчхан.
Ужо ў аэрапорце рэгістрацыя на рэйс, зноў інтэрв'ю і яшчэ большае прадчуванне алімпійскага свята. Заўтра нашы спартсмены ўжо будуць у поўную сілу адчуваць атмасферу Пхёнчхана.
Тут жа, у аэрапорце, і сэрвісная група зборнай Беларусі па біятлоне.
Нашы біятланісты, як вядома, паляцелі ў Паўднёвую Карэю на суткі раней. Дзяўчаты трэніраваліся ў Хохфільцэне, мужчыны - Антхольцы. І сабраўшыся ў Мюнхене, адправіліся ў Сеул.
Спаборніцтвы ў біятланістаў, і, дарэчы, у лыжнікаў пройдуць на базе вось гэтага маляўнічага лыжнага спарткомплекса "Альпенсія". Ужо заўтра па плане - першыя трэніроўкі.
Мяркуючы па сацыяльных сетках, нашы дзяўчаты ў Пхёнчхане адчуваюць сябе выдатна.
Сёння мы таксама звязаліся з галоўным трэнерам зборнай Беларусі па фрыстайле Мікалаем Казекам - зборная трэніруецца паблізу Паўднёвай Карэі.
У сталіцы зімовых Алімпійскіх гульняў ужо пабываў кіраўнік Міжнароднага алімпійскага камітэта Томас Бах, які прыбыў на электрычцы, каб праверыць ход падрыхтоўчых работ. Паводле слоў кіраўніка алімпійскага руху, ён з нецярпеннем чакаў такога моманту. Томас Бах таксама адзначыў і гатоўнасць алімпійскай вёскі, якая расчыніла свае дзверы сёння.
Томас Бах, кіраўнік Міжнароднага алімпійскага камітэта:
"Гэта сэрца Алімпійскіх гульняў. Зараз мы можам сказаць, што гэта адна з лепшых, калі не лепшая вёска ў гісторыі Алімпійскіх гульняў".
Тут будуць жыць спартсмены, трэнеры і члены спартыўных дэлегацый, у тым ліку і беларусы. Пляцоўка разбітая на два кластары. Першы ў гарах - прыме 3 тысячы 500 чалавек, другі - на 2 тысячы 700 - знаходзіцца на ўзбярэжжы.
З кожным днём Алімпійскія гульні набліжаюцца. Белтэлерадыёкампанія запланавала 154 гадзіны вяшчання з Паўднёвай Карэі. Колькі часу нададуць прамым трансляцыям? Якія віды спорту прадстаўлены? І якіх сенсацый чакаць ад стартаў? І нават як правільна называць сталіцу Алімпіяды - можна даведацца на сайце Белтэлерадыёкампаніі.
Павел Булацкі, дырэктар дырэкцыі тэлеканала "Беларусь 5":
"На "Беларусь 1" будуць трансляцыі адкрыцця і закрыцця, у тым ліку "Дзённікі" пасля "Панарамы". На "Беларусь 2" будуць прапанаваны трансляцыі беларускіх спартсменаў".
"Беларусь 5" і зусім стане алімпійскім - у тэлегледачоў каналаў Белтэлерадыёкампаніі будзе выдатная магчымасць стаць удзельнікамі галоўных Гульняў чатырохгоддзя, якія зусім хутка пачнуцца ў Паўднёвай Карэі.