Матч Бельгія - Беларусь пройдзе ў 100-тысячным горадзе Лёвен, за 30 кіламетраў ад Бруселя. Той факт, што гэта невялікі стадыён, не мае ніякага значэння ў перыяд пандэміі. Трыбуны ўсё роўна сёння застануцца пустымі.
Меры бяспекі
З пятніцы мінулага тыдня ў Бельгіі ўведзены дадатковыя меры бяспекі. Закрыты ўсе навучальныя ўстановы, акрамя дашкольных. У кафэ ежа толькі на вынас. У нехарчовых магазінах уведзены папярэдні запіс. Пасля 22 гадзін на вуліцы з'яўляцца нельга без уважлівай прычыны. Але мясцовых жыхароў усё ж не ўдаеццаа ў поўнай меры прымусіць выконваць гэтыя правілы. Прыйшла вясна - сёння да +23. Нават маскі тут носяць не ўсе і не заўсёды.Футбольная супольнасць антыкавідны пратакол выконвае дбайна. Тэсты перад вылетам, мінімум кантактаў, а ўжо ў Бруселі беларусам прапанавалі яшчэ раз праверыцца.
Беларусь рыхтуецца да матча супраць лепшай зборнай свету
Беларусам сёння гуляць супраць першай зборнай свету ў рэйтынгу ФІФА. Яна моцная і камандай, і індывідуальна. Вялікая праблема - як стрымаць самага габарытнага форварда Еўропы Рамелу Лукаку.
У перадматчавай трэніроўцы прымалі ўдзел усе 25 гульцоў. Беларусы не збіраюцца гуляць толькі ад абароны, нягледзячы на вялізны аўтарытэт саперніка.
Зносіны на свежым паветры падчас пандэміі ў Бельгіі скарацілі з 10 да 4 чалавек. Але сёння ў Лёвене гэты загад выконвацца не будзе. Беларусы вельмі пастараюцца парушыць субардынацыю ў рэйтынгу ФІФА, стварыць сенсацыю, а для гэтага спатрэбіцца шчыльная апека, маналітная абарона.
У апошнія гады ў беларускім футболе авітаміноз станоўчых эмоцый. Метад лячэння просты і зразумелы - перамогі, ачкі або проста якасны футбол. Што ж, будзем верыць.