Два бронзавыя медалі і сёмае агульнакаманднае месца.
Беларуская эстафетная чацвёрка напярэдадні папоўніла медальную скарбонку чэмпіянату Еўропы па біятлоне. На трэцюю прыступку п'едэстала пашаны ў змяшанай эстафеце падняліся Дынара Алімбекава, Ганна Сола, Раман Ялётнаў і Сяргей Бачарнікаў. У першы дзень спаборніцтваў, нагадаем, Ірына Крыўко выйграла бронзу ў індывідуальнай гонцы. Чэмпіянат Еўропы сёння ўзяў паўзу. Спаборніцтвы ў Раўбічах не праходзяць, спартсмены трэніруюцца, прычым як біятланісты, так і фрыстайлісты. Беларускі спарткомплекс трэці раз у гісторыі прымае этап Кубка свету па лыжнай акрабатыцы. Сёлета ён перадапошні ў календары, але вельмі прадстаўнічы. У Раўбічы з'ехалася эліта сусветнага фрыстайла - больш як 60 спартсменаў з 12 краін свету. Напярэдадні прайшлі першыя афіцыйныя трэніроўкі.
У складзе зборнай Беларусі выступяць Антон Кушнір, Аляксандра Раманоўская, Дзмітрый Мазуркевіч, Арцём Башлакоў, а таксама нашы юніёры - Сняжана Драбянкова, Вольга Хромава і Яна Ярмашэвіч. Кваліфікацыя этапа Кубка свету стартуе ў суботу ў 14:25. Фіналы пачнуцца ў 19 гадзін. Прамую трансляцыю з беларускага схілу будзе весці "Беларусь 5".
