Рашэнне аб стварэнні свята прынята 70 гадоў таму на 42-й сесіі МАК у швейцарскім Санкт-Морыцы. Нацыянальныя камітэты самі вызначаюць дату спартыўнага мерапрыемства. Сёлета ў Беларусі гэта 2 чэрвеня. Месца: спартыўна-аздараўленчы комплекс "Алімпійскі" на вуліцы Сурганава ў Мінску.
Прэзідэнт Беларусі накіраваў зварот удзельнікам. "Сённяшняе мерапрыемства прысвечана самым папулярным на планеце спаборніцтвам - Алімпійскім гульням. Яны з'яўляюцца важнай традыцыяй, якая спрыяе ўмацаванню міру, добрасуседства і супрацоўніцтва паміж народамі", - гаворыцца ў звароце.
Арганізатары прадугледзелі насычаную праграму. Асабліва пашанцавала дзецям. Самых здольных запісвалі ў спартыўныя секцыі проста на месцы. Рэпартаж са святкаванняў Міжнароднага алімпійскага дня ў Паўла Капуцкага. А таксама галоўная спартыўная сенсацыя дня.
У адной з самых запатрабаваных палатак Надзея Скардзіна цярпліва раздае аўтографы і ўсміхаецца на сумесных з балельшчыкамі фота. Праз гадзіну ў прамым эфіры 15-гадзінных навін на "Беларусь 1" яна адкажа на галоўнае пытанне ў сваёй кар'еры.
Алімпійская чэмпіёнка Гульняў у Пхёнчхане ў складзе нашай эстафеты.
Уладальніца Малога хрустальнага глобуса ў індывідуальных гонках у заліку мінулага сезона. Лепшы снайпер сусветнага жаночага біятлона!
Распавесці пра завяршэнне кар'еры ў прамым эфіры на галоўным канале краіны Надзея пагадзілася адразу. Зараз трэба дачакацца рашэння Дар'і Домрачавай і арганізаваць прыгожыя праводзіны. Для адной або дзвюх выбітных спартсменак. Здаецца, у нашым біятлоне наступае не проста новы этап. Новая эра!
А гэта ўжо іншая алімпійская чэмпіёнка. Фрыстайлістка Ганна Гуськова сканчаць не збіраецца. З маскотам яна пасябравала за некалькі секунд.
Секцыю фрыстайлу ў праграму святкаванняў уключылі ў апошні момант. Планавалася 35 відаў, а стала 36. Лёгкая атлетыка, баскетбол, настольны тэніс, біятлон, бокс… Юныя ўдзельнікі прайшлі кароткі навучальны курс. Самых таленавітых на месцы запісвалі ў спартыўныя секцыі.
Праз год на тэрыторыі САК “Алімпійскі” пройдуць ІІ Еўрапейскія гульні. А менавіта спаборніцтвы па стральбе з лука і пляжным футболе. Сёння тут усталявалі памятную таблічку пра пачатак будаўніцтва стадыёна для пляжнага футбола.
Вяслярны трэнажор - няпростае выпрабаванне. Наймацнейшыя маглі зарабіць бясплатнае марожанае. Больш сур'ёзная ўзнагарода для тых, хто вырашыўся прайсці алімпійскі квест. Аляксандра Герасіменя, у адрозненне ад Надзеі Скардзіны, яшчэ не вырашыла, ці завяршаць кар'еру. А пакуль яна адкрыла сваю школу плавання і запусціла праект па навучанні плаванню дзяцей з аўтызмам. Сёння залатая рыбка прэзентавала адпаведную фотавыставу.